Qazaqstandyqtardyń naqty tabysy keiingi bir jyl ishinde alǵash ret oń kórsetkish kórsetti. Bul týraly Ulttyq ekonomika ministrligi Ulttyq statistika biýrosynyń málimetterin taldaý qorytyndysy boiynsha málimdedi, dep habarlaidy dalanews.kz.
Ministrliktiń dereginshe, halyqtyń naqty aqshalai kirisi 0,1%-ǵa artqan. Bul az kóringenimen, keiingi 12 aidaǵy quldyraýdan keiingi alǵashqy oń dinamika bolyp otyr. Oǵan negizgi sebep - eldegi infliatsiianyń, sonyń ishinde kúndelikti tutyný taýarlary baǵasynyń birtindep turaqtanýy. Jyldyq infliatsiia deńgeii jyl basynan beri báseńdep, maýsym aiynda 10,3%-ǵa deiin tómendegen.
"Burynǵysynsha, azamattardyń baqýatty ómiriniń negizgi kózi - jaldamaly jumys. Odan túsetin tabys halyqtyń jalpy aqshalai kirisiniń shamamen úshten eki bóligin (60-70%) quraidy. Degenmen, eńbekaqy deńgeii ekonomikanyń ár salasynda ártúrli", - dep atap ótti Ulttyq ekonomika ministrligindegiler.
Statistikaǵa súiensek, ótken jyldyń sáikes kezeńimen salystyrǵanda ortasha ailyq jalaqynyń eń joǵary ósimi myna salalarda baiqalǵan:
- Aýyl sharýashylyǵy;
- Qarjy jáne saqtandyrý qyzmeti;
- Kólik jáne qoimalaý;
- Óńdeý ónerkásibi.
Sarapshylardyń pikirinshe, infliatsiia aýyzdyqtalsa, halyqtyń satyp alý qabileti aldaǵy ýaqytta da arta bermek.
