Úkimet Astananyń injenerlik jáne energetikalyq infraqurylymyn damytýǵa 16,2 mlrd teńgeden asa qarjy bólingenin málimdedi, dep habarlaidy dalanews.kz.
Premer-ministr Oljas Bektenov tiisti qaýlylarǵa qol qoidy. Jobalardy júzege asyrý qarqyndy turǵyn úi qurylysy men qala halqy sany ósýine bailanysty káriz, jylý, elektrmen jabdyqtaý júieleriniń senimdi ári úzdiksiz jumysyn qamtamasyz etýge múmkindik beredi.
Jalpy qarjylandyrý kólemi 16,2 mlrd teńgeden asady. Onyń 8,7 mlrd teńgesi sý burý infraqurylymyn salýǵa jáne jańǵyrtýǵa baǵyttalady.
Esil aýdanyndaǵy qoldanystaǵy tazartý qurylystarynan bastap Aqmola oblysyndaǵy Qarabidaiyq kóline deiingi káriz kollektory qaita jańǵyrtylady. Sonymen qatar, Uly Dala, Hýsein ben Talal, Shyńǵys Aitmatov kósheleri men Turan dańǵyly boiynan Esil ózenine deiin tazartylǵan aǵyn sý aǵyzatyn kollektor salynady. Kózdelgen jumystardy júzege asyrý 4,5 myń gektar aýmaqtaǵy jerústi jáne drenaj sýlaryn burýǵa, sondai-aq, táýligine 70 myń tekshe metrge deiingi sýdy tazartatyn nysandardyń turaqty jumysyn qamtamasyz etýge múmkindik beredi. Bul óz kezeginde Astanany odan ári damytýǵa qajet infraqurylym qalyptastyrady.
7,5 mlrd teńge elordanyń energetikalyq infraqurylymyn damytýǵa baǵyttalady. Bul qarajatqa qoldanystaǵy elektr jelilerine qosylatyn 110/20 kVt-tyq "Qarlyǵash" jabyq qosalqy stansasy salynyp, "Astana-Energiia" AQ-nyń JEO-2-degi №1 týrboagregaty jańǵyrtylady.
Jańa energonysan iske qosylǵannan keiin "Esil" jáne "Báiterek" qosalqy stansalaryna túsetin júkteme azaiyp, "Nurly jol" vokzaly mańy men Telman turǵyn alabyndaǵy shamamen 80 myń turǵyn turaqty elektrmen qamtamasyz etiledi.
