Qazaqstanda qan tapsyrý isine eleýli úles qosqan azamattardy marapattaýǵa arnalǵan "Qurmetti donor" jańa tósbelgisi engizildi, dep habarlaidy dalanews.kz.
Tósbelginiń negizgi belgisi retinde qan tamshysynyń beinesi tańdalǵan. Tamshynyń ishinde júrek soǵysynyń grafikalyq yrǵaǵy beinelense, búkil kompozitsiia kúńgirt óńdelgen dóńgelek jiekpen kómkerilgen.
"Qurmetti donor" tósbelgisiniń alǵashqy iegerleri 481 adam bolady. Marapat Qazaqstan azamattaryna, sondai-aq shetel azamattary men azamattyǵy joq adamdarǵa mynadai talaptardyń birin oryndaǵan jaǵdaida beriledi:
- qandy jáne (nemese) trombotsitti keminde 40 ret tapsyrǵandarǵa;
- qan plazmasyn keminde 70 ret tapsyrǵandarǵa.
Densaýlyq saqtaý ministrliginiń málimetinshe, jyl saiyn elimizde 180 myńnan astam adam donor atanyp, jalpy sany 255 myńnan astam ret qan tapsyrady. Sonyń arqasynda jyl saiyn 80 myńnan astam naýqasqa sapaly qan quiý qyzmeti kórsetiledi.
