Salyq túsimi turǵysynda aimaqtarǵa qatysty kózge kórine bermeitin bir ádiletsizdik bar. Zańdy turǵydan bolsyn, biýdjettik jaǵynan bolsyn. Osylai degen qarjyger-maman Rasýl Rysmambetov elimizdegi ónerkásip kompaniialaryn tirkelgen orny emes, jumys istep jatqan jerine salyq tóleýdi mindetteýdi usynady, dep jazady Dalanews.kz.
Máselen, Astanada "Samuryq-Qazyna" ulttyq ál-aýqat holdingi tirkelgen, iaǵni ol osy arada salyq tóleidi. Barlyq derlik bankter - Almatyda. Tiisinshe salyqtar osynda túsedi. Osy jaǵynan alǵanda, bizde donor úsh óńir bar: Almaty, Atyraý oblysy jáne Astana, qalǵandary respýblikalyq biýdjetke iek artady. Muny Úkimet ár kez óńirler esine salyp otyrady. Transfertter bólgen saiyn "aramtamaqtar" degen sózdi estigen kimge jaqsy deisiz?
Bul arada másele prezident, úkimet basshysy, úkimet nemese prezident ákimshiliginde de emes. Másele árdaiym óktemdik etkisi kelip turatyn memlekettik aparattyń ózinde. Osylai tóbeńnen dikeńdep turǵanda jergilikti bilik bastamashylyq qabiletinen aiyrylyp, ózinshe oilaýǵa da murshasy bolmai jatatyny zańdy. Jalpy, ortalyqsyzdandyrý degen kóp aitylatyn terminniń biri.
Qarjyger Rasýl Rysmambetov, mine, osy másele sheshimin salyqtan bastaý kerek ekenin aitady. Óitkeni kúshti óńir kúshti memlekettiń tolyqqandy bóligi bolyp tabylady.
Onyń pikirinshe, atalǵan úsh óńir búkil eldi asyrap otyr deý jańsaqtyq.
"Is júzinde bizde donor aimaqtar kóp. Bul arada mynandai bir qisynsyz jaǵdai bar. Munyń bári zańdy tulǵalardyń qai jerde tirkelgenine bailanysty. Salyqtar bizde naqty qyzmet orny emes, tirkeý ornyna qarai tólenedi. Almaty men Astana biýdjeti shaǵyn jáne orta biznes esebinen, sondai-aq Almatyniki sol jerde tirkelgen bankter men munai kompaniialary esebinen qosymsha tolyqtyrylady. Atyraýda munai-gaz sektorynyń arqasynda. Astanada salyq tóleýde kvazimemlekettik kompaniialar da mańyzdy ról atqarady. Eger Qyzylorda jáne Mańǵystaý oblystarynda jumys isteitin munai kompaniialary munai óndirý orny boiynsha salyq tóleitin bolsa, onda jaǵdai basqasha bolar edi. Al olar qazir tirkelgen orny - Almatyǵa, Astanaǵa salyq tóleidi. Iaǵni, mundai jaǵdaida donor óńirler áldeqaida kóp bolatyn edi", - deidi ol.
