Almaty qalasynda joldy jaýyp, namaz oqyǵan 30-dan astam adam ákimshilik jaýapkershilikke tartyldy, dep habarlaidy Dalanews.kz.
Politsiia departamenti jol qozǵalysyna kedergi keltirý, qandai jaǵdaida bolsa da, Qazaqstan zańnamasyna qaishy áreket ekenin jáne bul úshin jaýapkershilik qarastyrylǵanyn eskertti.
“Zań talaptaryn buzǵan 30-dan astam azamatqa Qazaqstan Respýblikasynyń Ákimshilik quqyq buzýshylyq týraly kodeksiniń 614-baby (“Kólik qozǵalysyna kedergi jasaý”) boiynsha shara qoldanyldy. Politsiia departamenti turǵyndardy zańǵa qurmetpen qaraýǵa jáne mundai quqyq buzýshylyqtarǵa jol berilmeitinin eske salady”, — delingen vedomstvonyń baspasóz qyzmetiniń málimdemesinde.
Aita keteiik, buǵan deiin Almatyda bir top adam joldyń adamdar júretin bóliginde namaz oqyp, kólik qozǵalysyn toqtatyp, keptelis týdyrǵan edi.
Osyǵan bailanysty Almaty qalalyq politsiia departamenti pikir bildirdi. Olardyń málimetinshe, bul jaǵdai Medeý aýdanynda bolǵan.
"Tártip saqshylary oqiǵa ornyna baryp, azamattarǵa quqyq buzýshylyqtyń jaýapkershilikke ákeletinin túsindirdi. Jol qozǵalysy erejelerin qatań saqtaý kerektigin eskertti", — dep habarlady politsiia departamentiniń baspasóz qyzmeti.
Sonymen qatar Almaty qalalyq politsiia departamenti jaǵdai boiynsha tekserý júrgizip jatqanyn habarlady.
"Tiisti sharalar qabyldanady. Sonymen birge, Almaty qalalyq politsiia departamenti "Zań jáne tártip” printsipin eske salyp, azamattardy Qazaqstan Respýblikasynyń zańnamasyn qatań saqtaýǵa shaqyrady. Kez kelgen sebeppen joldy jabý – jol qozǵalysy erejelerin buzý bolyp tabylady jáne ÁQBtK-niń 614-babyna sáikes jaýapkershilikke tartylady", — delingen habarlamada.
Atalǵan oqiǵadan keiin Qazaqstan musylmandary dini basqarmasy jolda namaz oqýǵa tyiym salynatynyn málimdegen bolatyn.
Qazaqstan musylmandary dini basqarmasynyń baspasóz qyzmeti namaz oqý úshin joldy jaýyp, basqa adamdarǵa ziian keltirýdiń jónsiz áreket ekenin eskertti.
“Namaz oqý úshin joldy jaýyp, basqa adamdarǵa ziian keltirýge bolmaidy. Sol sebepti sizderdi namazǵa erterek kelýge, arnaiy belgilengen oryndarda otyrýǵa, joldardy jappaýǵa, kólikterdi ruqsat etilgen jerlerge qoiýǵa jáne tártip pen talaptardy qatań saqtaýǵa shaqyramyz”, – delingen basqarma habarlamasynda.
