الماتى قالاسىندا جولدى جاۋىپ، ناماز وقىعان 30-دان استام ادام اكىمشىلىك جاۋاپكەرشىلىككە تارتىلدى، دەپ حابارلايدى Dalanews.kz.

پوليسيا دەپارتامەنتى جول قوزعالىسىنا كەدەرگى كەلتىرۋ، قانداي جاعدايدا بولسا دا، قازاقستان زاڭناماسىنا قايشى ارەكەت ەكەنىن جانە بۇل ءۇشىن جاۋاپكەرشىلىك قاراستىرىلعانىن ەسكەرتتى.

“زاڭ تالاپتارىن بۇزعان 30-دان استام ازاماتقا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 614-بابى (“كولىك قوزعالىسىنا كەدەرگى جاساۋ”) بويىنشا شارا قولدانىلدى. پوليسيا دەپارتامەنتى تۇرعىنداردى زاڭعا قۇرمەتپەن قاراۋعا جانە مۇنداي قۇقىق بۇزۋشىلىقتارعا جول بەرىلمەيتىنىن ەسكە سالادى”، — دەلىنگەن ۆەدومستۆونىڭ باسپا ءسوز قىزمەتىنىڭ مالىمدەمەسىندە.

ايتا كەتەيىك، بۇعان دەيىن الماتىدا ءبىر توپ ادام جولدىڭ ادامدار جۇرەتىن بولىگىندە ناماز وقىپ، كولىك قوزعالىسىن توقتاتىپ، كەپتەلىس تۋدىرعان ەدى.

وسىعان بايلانىستى الماتى قالالىق پوليسيا دەپارتامەنتى پىكىر ءبىلدىردى. ولاردىڭ مالىمەتىنشە، بۇل جاعداي مەدەۋ اۋدانىندا بولعان.

"ءتارتىپ ساقشىلارى وقيعا ورنىنا بارىپ، ازاماتتارعا قۇقىق بۇزۋشىلىقتىڭ جاۋاپكەرشىلىككە اكەلەتىنىن ءتۇسىندىردى. جول قوزعالىسى ەرەجەلەرىن قاتاڭ ساقتاۋ كەرەكتىگىن ەسكەرتتى"، — دەپ حابارلادى پوليسيا دەپارتامەنتىنىڭ باسپا ءسوز قىزمەتى.

سونىمەن قاتار الماتى قالالىق پوليسيا دەپارتامەنتى جاعداي بويىنشا تەكسەرۋ جۇرگىزىپ جاتقانىن حابارلادى.

"ءتيىستى شارالار قابىلدانادى. سونىمەن بىرگە، الماتى قالالىق پوليسيا دەپارتامەنتى "زاڭ جانە ءتارتىپ” ءپرينسيپىن ەسكە سالىپ، ازاماتتاردى قازاقستان رەسپۋبليكاسىنىڭ زاڭناماسىن قاتاڭ ساقتاۋعا شاقىرادى. كەز كەلگەن سەبەپپەن جولدى جابۋ – جول قوزعالىسى ەرەجەلەرىن بۇزۋ بولىپ تابىلادى جانە اقبتك-نىڭ 614-بابىنا سايكەس جاۋاپكەرشىلىككە تارتىلادى"، — دەلىنگەن حابارلامادا.

اتالعان وقيعادان كەيىن قازاقستان مۇسىلماندارى ءدىني باسقارماسى جولدا ناماز وقۋعا تىيىم سالىناتىنىن مالىمدەگەن بولاتىن.

قازاقستان مۇسىلماندارى ءدىني باسقارماسىنىڭ باسپا ءسوز قىزمەتى ناماز وقۋ ءۇشىن جولدى جاۋىپ، باسقا ادامدارعا زيان كەلتىرۋدىڭ ءجونسىز ارەكەت ەكەنىن ەسكەرتتى.

“ناماز وقۋ ءۇشىن جولدى جاۋىپ، باسقا ادامدارعا زيان كەلتىرۋگە بولمايدى. سول سەبەپتى سىزدەردى نامازعا ەرتەرەك كەلۋگە، ارنايى بەلگىلەنگەن ورىنداردا وتىرۋعا، جولداردى جاپپاۋعا، كولىكتەردى رۇقسات ەتىلگەن جەرلەرگە قويۋعا جانە ءتارتىپ پەن تالاپتاردى قاتاڭ ساقتاۋعا شاقىرامىز”، – دەلىنگەن باسقارما حابارلاماسىندا.