Astana ákimdigi ınfraqurylymdyq nysandardy salý boıynsha júıeli jumys júrgizip keledi. Bul nysandar qalany úzdiksiz jylýmen, sýmen jabdyqtaýmen, sý burýmen qamtamasyz etýge múmkindik beredi, dep málim etti Jeńis Qasymbek.

– Sońǵy eki jylda Astana jylytý maýsymyn alǵash ret jylý profısıtimen ótkizip jatyr. 2023 jyly «Turan» jáne «Ońtústik-SHyǵys» jańa gaz jylý stansıalarynyń iske qosylýynyń arqasynda JEO-3 birinshi kezeginiń jylý qýaty 30%-ǵa ulǵaıdy. Bul qalanyń qajettilikterin tolyǵymen qamtamasyz etýge múmkindik beredi. Mysaly, qazirgi ýaqytta aýanyń ortasha temperatýrasy -10-15 gradýs bolǵan kezde jylý generasıasynyń profısıti saǵatyna 1200 Gkal quraıdy.

Budan basqa, «Telman» gaz jylý stansıasynyń qurylysy júrip jatyr, kelesi jyly «Ońtústik-Batys» MTQ qurylysyn bastaımyz, bul qalany 2035 jylǵa deıin jetkilikti jylýmen qamtamasyz etedi, – dedi Astana ákimi.

Sondaı-aq, Astana ákimdigi 2023 jyly úshinshi sorǵy-súzgi stansıasynyń (SSS-3) qurylysyn aıaqtap, paıdalanýǵa berdi. Ol qalaǵa táýligine 100 myń tekshe metrden astam sý jiberýge múmkindik jasady, sondaı-aq Astana sý qoımasynan ekinshi sý qubyrynyń qurylysy aıaqtaldy.

Kelesi jyly Nura jer asty sýlary ken ornynan sý qubyryn salýǵa, sondaı-aq Telman sorǵy stansıasyn keńeıtýge kirisý josparlanyp otyr. Uzaq merzimdi sharalar aıasynda Sátbaev atyndaǵy arnadan jańa sý qubyry jobalanyp otyr. Osy jobalardy iske asyrý 2035 jylǵa deıin qalany turaqty sýmen qamtamasyz etedi.

Sý burý problemasyn sheshý úshin 2025 jyly ónimdiligi táýligine 188 myń tekshe metr KOS-2 qurylysyn bastaý josparlanyp otyr. Sonymen qatar, senimdi sý burý isin qamtamasyz etý maqsatynda eki turǵyn alapta jáne Indýstrıalyq park aýdanynda jalpy qosymsha qýaty táýligine shamamen 85 myń tekshe metr bolatyn úsh jergilikti tazartý qurylysynyń jobalary ázirlenip jatyr.