Qazaqstan taýarlaryn da satatyn Grandiose saýda jelisi búkil álemdegi tamaq jáne dietalyq ónimderdi usynatyn premiým-segmentte jumys isteidi, dep jazady Dalanews.kz.
QR Saýda jáne integratsiia ministri Arman Shaqqaliev bastaǵan qazaqstandyq delegatsiia BAÁ-niń jetekshi saýda jelileri – LuLu Group International jáne Grandiose basshylyǵymen tabysty kelissózder júrgizdi. Ministrlik baspasóz qyzmetiniń habarlaýynsha, kezdesý barysynda taraptar qazaqstandyq ónimderdi jetkizýdi keńeitý, olardy BAÁ naryǵyna shyǵarý jáne Qazaqstandy azyq-túlik haby retinde ilgeriletý máselelerin talqylady.
Ministr Arman Shaqqaliev Qazaqstannyń BAÁ-ge et, bal, ýyldyryq jáne shokolad siiaqty joǵary sapaly ónimderdiń keń assortimentin usynýǵa daiyn ekenin atap ótti.
Kezdesýdiń negizgi taqyryptarynyń biri 2025 jyly qazaqstandyq ónimderdiń BAÁ naryǵyndaǵy tanymaldylyǵyn arttyrýǵa baǵyttalǵan birlesken marketingtik kampaniiany ótkizý boldy. Sondai-aq taraptar jeke saýda markalary (JSM) aiasyndaǵy yntymaqtastyq perspektivalaryn talqylady. Bul qazaqstandyq ekologiialyq taza jáne sapaly ónimderdi tutynýshylarǵa usynýǵa múmkindik beredi.
LuLu saýda jelisinde qazaqstandyq ónimder men taǵamdardyń degýstatsiialyq alańy uiymdastyryldy. Mázirge qazaqstandyq qoi etinen daiyndalǵan dástúrli taǵamdar – palaý men sirne usynyldy. Qazir qazaqstandyq et atalǵan sýpermarket jelilerinde satylymda bar.
Odan ári qazaqstandyq delegatsiia keiin Grandiose jelisine bardy. Jeliniń sórelerinde Qazaqstannan ákelingen ónimder – kámpitter, konditerlik ónimder, kúrish, bal, ýyldyryq, tuz jáne sý usynyldy. Saýda jelisiniń sanattyq menedjerlerimen kezdesýler ótkizilip, qazaqstandyq ónimderdi júzege asyrý jáne olardyń assortimentin keńeitý máseleleri talqylandy.
Kezdesý barysynda Grandiose saýda jelisimen memorandýmǵa qol qoiyldy. Qujatqa sáikes, taraptar qazaqstandyq ónimderdi jeli sórelerine shyǵarý boiynsha jumysty jandandyrýǵa kelisti.
"Búgin biz BAÁ-degi saýda jelilerinde qazaqstandyq ónimderdi tanystyryp, konditerlik ónimder, bal, túie sútinen jasalǵan qurǵaq untaq siiaqty negizgi eksporttyq ónimder boiynsha road show ótkizdik. Bul – Parsy shyǵanaǵyndaǵy barlyq elderde ókildikteri bar LuLu jelisi úshin jarnamalyq aktsiianyń bir túri. Biz bul jumys jaqsy nátije beretinine jáne jaqyn arada qazaqstandyq ónimder tek BAÁ-de ǵana emes, sonymen qatar Parsy shyǵanaǵy elderinde de laiyqty oryn alatynyna senimdimiz", – dep atap ótti Arman Shaqqaliev.
Aita ketsek, LuLu Group International – Taiaý Shyǵys, Aziia, Afrika jáne Eýropada 200-den astam dúkeni bar jetekshi halyqaralyq sýpermarketter men gipermarketter jelisi. Kompaniia azyq-túlik, turmystyq tehnika jáne turmysqa qajetti taýarlardyń keń assortimentin usyna otyryp, sapaly ónimderdi distribýtsiialaý salasynda kósh bastap keledi.
Grandiose – BAÁ-de jumys isteitin premiým segmenttegi 50 sýpermarketten turatyn jeli. Jeli jergilikti brendterdiń taýarlaryn, sondai-aq álemniń túkpir-túkpirinen gastronomiialyq jáne dietalyq ónimderdi usynady.
2024 jyly 4 qarashada Qazaqstannyń Qytaiǵa iri-qara terisin eksporttaityny belgili boldy.
