Astanada rekordty kólemde mektepter salyndy. Oqý jylynyń basynda 18 mektep salynyp, ashyldy. Olardyń bir bóligi – «Jaıly mektep» ulttyq jobasy aıasynda. Bul týraly OKQ brıfıńinde Astana ákimi Jeńis Qasymbek málim etti, – dep habarlaıdy Dalanews.kz.
– Qala turǵyndarynyń ósýin eskere otyryp, áleýmettik nysandarǵa qajettilik artyp keledi. Ózderińiz biletindeı, biz áleýmettik nysandardyń qurylys kólemin edáýir arttyrdyq. Máselen, jańa oqý jylynda 18 mektep salyndy. Olardyń 11-i Memleket basshysynyń tapsyrmasy boıynsha «Jaıly mektep» ulttyq jobasy aıasynda boı kóterdi, – dedi elorda ákimi Jeńis Qasymbek.
Oqý oryndary qalanyń barlyq aýdanynda, sonyń ishinde turǵyn alaptarda da salynyp jatyr. Mysaly, jeltoqsan aıynda Úrker turǵyn alabynda jańa úlgidegi mektep ashyldy. Oqý orny eki aýysymda 4 myń oqýshy ornyna eseptelgen. Qazirgi ýaqytta №69 mektep-lıseıinde balalar úsh aýysymda oqıdy. Osylaısha, jańa mektep tolyp ketý máselesin sheshedi. Balalar jańa mektepte úshinshi toqsannan bastap oqıdy.
«Jaıly mektep» ulttyq jobasy aıasynda 2024-2025 jyldar aralyǵynda jańa formatta 24 mektep salynady. Bul oqý oryndary eki aýysymda 90 myńǵa jýyq oqýshy ornyn ashýǵa múmkindik beredi.
Astanada osy jyldyń sońyna deıin taǵy birneshe mektep ashý josparlanyp otyr. Sondaı-aq, aldaǵy jyldarǵa da daıyndyq júrip jatyr. Mysaly, 2025 jyly taǵy 20-dan astam mektep salynyp, paıdalanýǵa berý josparlanyp otyr.
