استانادا رەكوردتى كولەمدە مەكتەپتەر سالىندى. وقۋ جىلىنىڭ باسىندا 18 مەكتەپ سالىنىپ، اشىلدى. ولاردىڭ ءبىر بولىگى – «جايلى مەكتەپ» ۇلتتىق جوباسى اياسىندا. بۇل تۋرالى وكق بريفينگىندە استانا اكىمى جەڭىس قاسىمبەك ءمالىم ەتتى، – دەپ حابارلايدى Dalanews.kz.

– قالا تۇرعىندارىنىڭ ءوسۋىن ەسكەرە وتىرىپ، الەۋمەتتىك نىساندارعا قاجەتتىلىك ارتىپ كەلەدى. وزدەرىڭىز بىلەتىندەي، ءبىز الەۋمەتتىك نىسانداردىڭ قۇرىلىس كولەمىن ەداۋىر ارتتىردىق. ماسەلەن، جاڭا وقۋ جىلىندا 18 مەكتەپ سالىندى. ولاردىڭ 11ء-ى مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا بوي كوتەردى، – دەدى ەلوردا اكىمى جەڭىس قاسىمبەك.

وقۋ ورىندارى قالانىڭ بارلىق اۋدانىندا، سونىڭ ىشىندە تۇرعىن الاپتاردا دا سالىنىپ جاتىر. مىسالى، جەلتوقسان ايىندا ۇركەر تۇرعىن الابىندا جاڭا ۇلگىدەگى مەكتەپ اشىلدى. وقۋ ورنى ەكى اۋىسىمدا 4 مىڭ وقۋشى ورنىنا ەسەپتەلگەن. قازىرگى ۋاقىتتا №69 مەكتەپ-ليسەيىندە بالالار ءۇش اۋىسىمدا وقيدى. وسىلايشا، جاڭا مەكتەپ تولىپ كەتۋ ماسەلەسىن شەشەدى. بالالار جاڭا مەكتەپتە ءۇشىنشى توقساننان باستاپ وقيدى.

«جايلى مەكتەپ» ۇلتتىق جوباسى اياسىندا 2024-2025 جىلدار ارالىعىندا جاڭا فورماتتا 24 مەكتەپ سالىنادى. بۇل وقۋ ورىندارى ەكى اۋىسىمدا 90 مىڭعا جۋىق وقۋشى ورنىن اشۋعا مۇمكىندىك بەرەدى.

استانادا وسى جىلدىڭ سوڭىنا دەيىن تاعى بىرنەشە مەكتەپ اشۋ جوسپارلانىپ وتىر. سونداي-اق، الداعى جىلدارعا دا دايىندىق ءجۇرىپ جاتىر. مىسالى، 2025 جىلى تاعى 20-دان استام مەكتەپ سالىنىپ، پايدالانۋعا بەرۋ جوسپارلانىپ وتىر.