Kúni keshe QR Ulttyq banki, úkimet jáne Stati taraptary aradaǵy munai-gaz sektoryna qatysty uzaqqa sozylǵan daýdy retteý protsesiniń sátti aiaqtalǵanyn habarlaǵan bolatyn. Búgin Ulttyq bank osy rette mańyzdy málimdeme jasady, dep jazady Dalanews.kz.
"Retteý nátijesinde QR Ulttyq banki Stati taraptarynyń Qazaqstan Respýblikasy Ulttyq qorynyń aktivterine qoiǵan talaptarynan bas tartýyna jáne Shvetsiiada qamtamasyz etý sharalarynyń yqpalynda bolǵan Qazaqstan Respýblikasy Ulttyq qorynyń aktivterin óz ieligine qaitarýǵa qol jetkizdi", delingen resmi habarlamada.
Ortalyq bank bul Qazaqstan Respýblikasy Ulttyq qorynyń uzaq merzimdi kiristiligin jaqsartý úshin jaǵdai jasaýǵa yqpal etetin operatsiialyq ikemdilikti arttyrýǵa jáne áleýetti investitsiialyq seriktesterdiń barynsha keń aýqymyn tartýǵa jańa múmkindikter ashady dep esepteidi.
Stati isine qatysty túpkilikti retteý týraly kelisimniń naqty sharttary jasyryn bolyp tabylatyny aldynda habarlanǵan edi.
Aita ketsek,2018 jyldyń qańtar aiynyń basynda Amsterdam soty moldovan kásipkeriniń shaǵymy boiynsha, "Samuryq-Qazyna" ulttyq ál-aýqat qoryna tiesili KMG Kashagan BV golland kompaniiasynyń 5,2 mlrd dollar bolatyn aktsiiasyn buǵattaý týraly sheshimin ózgerissiz qaldyrdy. Al bul sot sheshimi 2017 jyldyń 8 qyrkúieginde shyqqan edi. Stokgolm saýda palatasy bastamasymen qurylǵan sot qazaqstandyq tarapqa halyqaralyq mindettemelerin buzyp, Statige zalal keltirgen úshin 500 millionnan astam dollar tóleýdi mindettegen. Al jeltoqsan aiynda Ulttyq qordyń aktivine qyzmet kórsetetin Bank of New York Mellon Qazaqstan ulttyq qorynyń 22 milliard dollaryn buǵattaǵan edi.
Odan soń Ulttyq qordyń aqshasyn retteýshi Ulttyq bank elimizdiń atynan qarsy shaǵym túsirgenin málimdedi. Bizge belgili bolǵandai,Qazaqstan moldovan kásipkeri Stati men onyń sybailastaryn alaiaqtyq áreketteri úshin "Ujymdasqan qylmyspen jáne sybailas jemqorlyqpen kúres týraly" AQSh zańy aiasynda jazaǵa tartýdy surady.
