كۇنى كەشە ق ر ۇلتتىق بانكى، ۇكىمەت جانە ستاتي تاراپتارى اراداعى مۇناي-گاز سەكتورىنا قاتىستى ۇزاققا سوزىلعان داۋدى رەتتەۋ پروسەسىنىڭ ءساتتى اياقتالعانىن حابارلاعان بولاتىن. بۇگىن ۇلتتىق بانك وسى رەتتە ماڭىزدى مالىمدەمە جاسادى، دەپ جازادى Dalanews.kz.
"رەتتەۋ ناتيجەسىندە ق ر ۇلتتىق بانكى ستاتي تاراپتارىنىڭ قازاقستان رەسپۋبليكاسى ۇلتتىق قورىنىڭ اكتيۆتەرىنە قويعان تالاپتارىنان باس تارتۋىنا جانە شۆەسيادا قامتاماسىز ەتۋ شارالارىنىڭ ىقپالىندا بولعان قازاقستان رەسپۋبليكاسى ۇلتتىق قورىنىڭ اكتيۆتەرىن ءوز يەلىگىنە قايتارۋعا قول جەتكىزدى"، دەلىنگەن رەسمي حابارلامادا.
ورتالىق بانك بۇل قازاقستان رەسپۋبليكاسى ۇلتتىق قورىنىڭ ۇزاق مەرزىمدى كىرىستىلىگىن جاقسارتۋ ءۇشىن جاعداي جاساۋعا ىقپال ەتەتىن وپەراسيالىق يكەمدىلىكتى ارتتىرۋعا جانە الەۋەتتى ينۆەستيسيالىق سەرىكتەستەردىڭ بارىنشا كەڭ اۋقىمىن تارتۋعا جاڭا مۇمكىندىكتەر اشادى دەپ ەسەپتەيدى.
ستاتي ىسىنە قاتىستى تۇپكىلىكتى رەتتەۋ تۋرالى كەلىسىمنىڭ ناقتى شارتتارى جاسىرىن بولىپ تابىلاتىنى الدىندا حابارلانعان ەدى.
ايتا كەتسەك،2018 جىلدىڭ قاڭتار ايىنىڭ باسىندا امستەردام سوتى مولدوۆان كاسىپكەرىنىڭ شاعىمى بويىنشا، "سامۇرىق-قازىنا" ۇلتتىق ءال-اۋقات قورىنا تيەسىلى KMG Kashagan BV گوللاند كومپانياسىنىڭ 5،2 ملرد دوللار بولاتىن اكسياسىن بۇعاتتاۋ تۋرالى شەشىمىن وزگەرىسسىز قالدىردى. ال بۇل سوت شەشىمى 2017 جىلدىڭ 8 قىركۇيەگىندە شىققان ەدى. ستوكگولم ساۋدا پالاتاسى باستاماسىمەن قۇرىلعان سوت قازاقستاندىق تاراپقا حالىقارالىق مىندەتتەمەلەرىن بۇزىپ، ستاتيگە زالال كەلتىرگەن ءۇشىن 500 ميلليوننان استام دوللار تولەۋدى مىندەتتەگەن. ال جەلتوقسان ايىندا ۇلتتىق قوردىڭ اكتيۆىنە قىزمەت كورسەتەتىن Bank of New York Mellon قازاقستان ۇلتتىق قورىنىڭ 22 ميلليارد دوللارىن بۇعاتتاعان ەدى.
ودان سوڭ ۇلتتىق قوردىڭ اقشاسىن رەتتەۋشى ۇلتتىق بانك ەلىمىزدىڭ اتىنان قارسى شاعىم تۇسىرگەنىن مالىمدەدى. بىزگە بەلگىلى بولعانداي،قازاقستان مولدوۆان كاسىپكەرى ستاتي مەن ونىڭ سىبايلاستارىن الاياقتىق ارەكەتتەرى ءۇشىن "ۇجىمداسقان قىلمىسپەن جانە سىبايلاس جەمقورلىقپەن كۇرەس تۋرالى" اقش زاڭى اياسىندا جازاعا تارتۋدى سۇرادى.
