Biyl Astanada 170 aýla men qoǵamdyq keńistik abattandyryldy. Bul jumys qalanyń barlyq aýdanynda júrgizildi. OKQ brifinginde Astana ákimi Jeńis Qasymbek tartymdy oryndar qai jerde ashylǵany týraly aitty, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
– Biyl abattandyrý boiynsha aýqymdy jumys júrgizildi. Mysaly, Táýelsizdik saraiynyń aldyndaǵy «Qazaq Eli» alańynda jalpy aýdany 13 ga aýmaqta keshendi abattandyrý júrgizildi, Júrgenov kóshesinde jasyl býlvar ashyldy, bul kóshe shaǵyn aýdannyń negizgi kósheleriniń biri bolyp sanalady. Sondai-aq, Almaty aýdanynda Aqbulaq ózeniniń jaǵalaýy abattandyryldy. Ótken jyly Sh.Qudaiberdiuly dańǵylynan Abylai han dańǵylyna deiin jumys júrgizildi. Biyl Abylai han dańǵylynan Amman kóshesine deiin jumys júrgizildi.
«Jastar» saiabaǵy aitarlyqtai ózgerdi. Munda mynandai ózgerister boldy: sorǵy joly, konki parki, jańa oiyn alańy salyndy. Sonymen qatar, saiabaq aýmaǵynda «Sana» zamanaýi sport kesheni jumys isteidi, onda belsendi ómir salty úshin barlyq qajetti jaǵdai jasalǵan, – dep atap ótti elorda ákimi Jeńis Qasymbek.
Biyl qalanyń vokzal mańy men oǵan irgeles Birjan sal jáne Gete kósheleri abattandyryldy. Vokzal mańyndaǵy kóshelerdiń jalpy uzyndyǵy 1,5 km qurady. Qalanyń tarihi kóshelerin qaita jańartý jobasy aiasynda jalpy abattandyrý alańy 17 myń sharshy metrden asty.
Sonymen qatar, Ulytaý alleiasy, Máńgilik el dańǵyly, Táýelsizdik, Turan dańǵyldary, Myńjyldyq alleiasynyń bóligi, Kerýen jáne Han Shatyr SOO janyndaǵy gúlzarlar, Agroqalashyq eldi mekeni, Jeńis dańǵyly, Jaǵalaý shaǵyn aýdany, Ýálihanov kóshesi jáne t.b. abattandyrylyp, kógaldandyryldy.
Abattandyrý kezinde kógaldandyrýǵa erekshe nazar aýdarylady. Biyl qalada «jasyl beldeý» aýmaǵynda 1 mln-ǵa jýyq jasyl jelek otyrǵyzyldy. Qalany kógaldandyrý jarǵysy qabyldandy. Endi birde-bir qurylys salýshy salǵanyn nysanyn dendrojosparsyz jáne onyń ainalasyndaǵy jasyl keńistikterge kútim jasaý boiynsha úsh jyldyq mindettemesiz tapsyra almaidy.
