بيىل استانادا 170 اۋلا مەن قوعامدىق كەڭىستىك اباتتاندىرىلدى. بۇل جۇمىس قالانىڭ بارلىق اۋدانىندا جۇرگىزىلدى. وكق بريفينگىندە استانا اكىمى جەڭىس قاسىمبەك تارتىمدى ورىندار قاي جەردە اشىلعانى تۋرالى ايتتى، – دەپ حابارلايدى Dalanews.kz استانا قالاسى اكىمىنىڭ باسپا ءسوز قىزمەتىنە سىلتەمە جاساپ.

– بيىل اباتتاندىرۋ بويىنشا اۋقىمدى جۇمىس جۇرگىزىلدى. مىسالى، تاۋەلسىزدىك سارايىنىڭ الدىنداعى «قازاق ەلى» الاڭىندا جالپى اۋدانى 13 گا اۋماقتا كەشەندى اباتتاندىرۋ جۇرگىزىلدى، جۇرگەنوۆ كوشەسىندە جاسىل بۋلۆار اشىلدى، بۇل كوشە شاعىن اۋداننىڭ نەگىزگى كوشەلەرىنىڭ ءبىرى بولىپ سانالادى. سونداي-اق، الماتى اۋدانىندا اقبۇلاق وزەنىنىڭ جاعالاۋى اباتتاندىرىلدى. وتكەن جىلى ش.قۇدايبەردى ۇلى داڭعىلىنان ابىلاي حان داڭعىلىنا دەيىن جۇمىس جۇرگىزىلدى. بيىل ابىلاي حان داڭعىلىنان اممان كوشەسىنە دەيىن جۇمىس جۇرگىزىلدى.

«جاستار» ساياباعى ايتارلىقتاي وزگەردى. مۇندا مىنانداي وزگەرىستەر بولدى: سورعى جولى، كونكي پاركى، جاڭا ويىن الاڭى سالىندى. سونىمەن قاتار، ساياباق اۋماعىندا «سانا» زاماناۋي سپورت كەشەنى جۇمىس ىستەيدى، وندا بەلسەندى ءومىر سالتى ءۇشىن بارلىق قاجەتتى جاعداي جاسالعان، – دەپ اتاپ ءوتتى ەلوردا اكىمى جەڭىس قاسىمبەك.

بيىل قالانىڭ ۆوكزال ماڭى مەن وعان ىرگەلەس ءبىرجان سال جانە گەتە كوشەلەرى اباتتاندىرىلدى. ۆوكزال ماڭىنداعى كوشەلەردىڭ جالپى ۇزىندىعى 1،5 كم قۇرادى. قالانىڭ تاريحي كوشەلەرىن قايتا جاڭارتۋ جوباسى اياسىندا جالپى اباتتاندىرۋ الاڭى 17 مىڭ شارشى مەتردەن استى.

سونىمەن قاتار، ۇلىتاۋ اللەياسى، ماڭگىلىك ەل داڭعىلى، تاۋەلسىزدىك، تۇران داڭعىلدارى، مىڭجىلدىق اللەياسىنىڭ بولىگى، كەرۋەن جانە حان شاتىر سوو جانىنداعى گۇلزارلار، اگروقالاشىق ەلدى مەكەنى، جەڭىس داڭعىلى، جاعالاۋ شاعىن اۋدانى، ءۋاليحانوۆ كوشەسى جانە ت.ب. اباتتاندىرىلىپ، كوگالداندىرىلدى.

اباتتاندىرۋ كەزىندە كوگالداندىرۋعا ەرەكشە نازار اۋدارىلادى. بيىل قالادا «جاسىل بەلدەۋ» اۋماعىندا 1 ملن-عا جۋىق جاسىل جەلەك وتىرعىزىلدى. قالانى كوگالداندىرۋ جارعىسى قابىلداندى. ەندى بىردە-بىر قۇرىلىس سالۋشى سالعانىن نىسانىن دەندروجوسپارسىز جانە ونىڭ اينالاسىنداعى جاسىل كەڭىستىكتەرگە كۇتىم جاساۋ بويىنشا ءۇش جىلدىق مىندەتتەمەسىز تاپسىرا المايدى.