Resei Qazaqstanmen energetikalyq yntymaqtastyqty, onyń ishinde úshinshi elderdiń naryǵyna birlesip shyǵý baǵytynda keńeitýdi josparlap otyr. Bul týraly Resei Prezidenti Vladimir Pýtin halyqaralyq aqparat agenttikteri basshylarymen kezdesýde málimdedi, dep habarlaidy Dalanews.kz Kazinform agenttigine silteme jasai otyryp.
Kezdesý Sankt-Peterbýrg halyqaralyq ekonomikalyq forýmy aiasynda ótti.
Jiyn barysynda Qazaqstan Respýblikasy Prezidenti Teleradiokesheni direktorynyń orynbasary Asqar Jaldinov suraq qoidy:
— Qazaqstan men Resei arasyndaǵy ekonomikalyq yntymaqtastyq oń serpin saqtap otyr. Jahandyq syn-tegeýrinder jaǵdaiynda eki el arasyndaǵy saýda-ekonomikalyq bailanystardy odan ári damytý úshin ne isteýge bolady dep oilaisyz?
Bul saýalǵa jaýap bergen Vladimir Pýtin energetika salasy ekijaqty yntymaqtastyqtyń árdaiym basty baǵyty bolǵanyn atap ótti.
— Qazir biz energiia resýrstary men gaz jetkizý aiasyn keńeitýdi qarastyryp otyrmyz. Keńes odaǵy kezinde gaz infraqurylymy Reseiden Qazaqstanǵa jetkizýge beiimdelip qurylǵany belgili. Sol sebepti Qazaqstanda ózindik infraqurylym obektileri salynbaǵan bolatyn. Qazir Qazaqstan Prezidentimen energetika salasyndaǵy yntymaqtastyqty keńeitý múmkindikterin talqylap jatyrmyz. Biz úshinshi elderdiń naryǵyna birlesip shyǵý joldaryn, sondai-aq qazaqstandyq munaidy jetkizý boiynsha logistikalyq marshrýttardy uiymdastyrý máselesin qarastyryp otyrmyz, — dedi Pýtin.
Onyń aitýynsha, Qazaqstan eksportyna arnalǵan munaidyń negizgi bóligi Resei arqyly ótedi.
— Sizder bilesizder, qazaqstandyq eksporttyq munaidyń negizgi kólemi Resei Federatsiiasy arqyly tasymaldanady. Negizgi baǵyt – Kaspii Qubyr Konsortsiýmy (KQK) júiesi arqyly. Taǵy basqa baǵyttar da bar. Biraq eksportqa shyǵarylatyn munaidyń basym bóligi Resei arqyly ótedi. Biz Qazaqstannyń munai eksportyn ártaraptandyrýǵa múddeli ekenin túsinemiz jáne bul baǵytta qoldaý kórsetýge daiynbyz, — dedi Resei Prezidenti.
Sondai-aq ol Baiqońyr ǵarysh ailaǵyn paidalaný, spýtniktik toptamalardy damytý jáne birlesken zertteýlerdi qamtityn ǵarysh salasyndaǵy ortaq jobalardy da eske saldy.
Aita keteiik, osy jiynda Qazaqstan men Resei arasyndaǵy taýar ainalymynyń 95%-ǵa jýyǵy ulttyq valiýtalarmen júzege asyrylatyny aityldy.
Álemdik jetekshi aqparat agenttikteri basshylarymen kezdesýde Pýtin Qazaqstan men Resei arasyndaǵy erekshe qarym-qatynas jaily da pikir bildirdi.
— Bizde Qazaqstanmen erekshe qarym-qatynas bar. Bul aiqyn, muny bári jaqsy túsinedi. Bul – odaqtastyq qarym-qatynas sózdiń týra maǵynasynda. Ortaq tarihymyz, bir memlekettiń quramynda bolǵanymyz, adamdar arasyndaǵy jeke ári gýmanitarlyq deńgeidegi tereń bailanystar — munyń bári asa mańyzdy, — dedi V. Pýtin.
Memleket basshysy Qazaqstannyń UQShU, Eýraziialyq ekonomikalyq odaq jáne Shanhai yntymaqtastyq uiymy syndy irgeli integratsiialyq birlestikterdiń múshesi ekenin aityp, bul faktor ekijaqty bailanystardy nyǵaitýǵa yqpal etip otyrǵanyn atap ótti.
— Bul biz úshin asa mańyzdy baǵyttaǵy ózara is-qimyldy damytýǵa jaǵdai jasaidy. Qazaqstan men Resei arasyndaǵy shekara — álemdegi eń uzyn qurlyqtyq shekara. Bul da eleýli faktor. Osy turǵydan alǵanda da biz yntymaqtastyqty jalǵastyramyz, — dedi Resei Prezidenti.
Ol Qazaqstanmen qarym-qatynasta eshqandai kedergi kórip turmaǵanyn airyqsha atap ótti.
— Taǵy da atap ótkim keledi: Qazaqstan – biz úshin eń jaqyn memleketterdiń biri. Bul — bizdiń odaqtasymyz. Qarym-qatynastarymyzdyń damýyna kedergi keltiretin eshqandai másele kórip turǵanym joq, tipti eshqandai, — dedi Pýtin.
Sondai-aq, ol Máskeý men Astana yntymaqtastyqtyń jańa baǵyttaryn izdestirýdi jalǵastyratynyn aitty.
— Biz Qasym-Jomart Kemelulymen únemi kezdesip turamyz. Ol bizge keledi, men de Qazaqstanǵa úlken yqylaspen baramyn. Úkimet, ministrlikter, sonyń ishinde Syrtqy ister ministrlikteri deńgeiinde keńes berý jáne ózara is-qimyl úzdiksiz júrip jatyr, — dep túiindedi sózin Resei Prezidenti.
Buǵan deiin Resei Prezidentiniń Iran Men Izrail qaqtyǵysyna qatysty beldirgen kózqarasy týraly jazǵanbyz.
