Qazaqstanda sheteldik joǵary oqý oryndarynan aýysatyn stýdentterdi ENT nemese keshendi testileýden ótýge mindetteý usynyldy, dep habarlaıdy Dala News.
Ǵylym jáne joǵary bilim mınıstrliginiń buıryq jobasyna sáıkes, shetelden aýysatyn nemese qaıta oqýǵa qabyldanatyn stýdentter:
•oqý nátıjeleri kórsetilgen transkrıpt;
•ENT nemese keshendi testileý sertıfıkatyn usynýy tıis.
Sertıfıkattaǵy bal tıisti mamandyq boıynsha belgilengen shekti deńgeıden tómen bolmaýy qajet.
Eger stýdentte ENT nemese KT sertıfıkaty bolmasa, joǵary oqý orny ony bir akademıalyq kezeńge shartty túrde qabyldaı alady. Osy ýaqyt ishinde stýdent test tapsyrýy tıis.
Qujatqa sáıkes, ári qaraı oqý tek qajetti shekti bal jınaǵan jaǵdaıda ǵana jalǵasady.
Sonymen qatar birqatar jeńildikter qarastyrylǵan.
Atap aıtqanda:
•álemdik reıtıńtiń top 700 ýnıversıtetinen;
•EYDU elderiniń ulttyq reıtıńindegi top 100 oqý ornynan;
•nemese Qazaqstandaǵy sheteldik JOO fılıaldarynan aýysatyn stýdentter úshin
ENT nemese KT tapsyrý talaby qoldanylmaıdy.
Budan bólek, doktoranttardy qorǵaýǵa jiberý aldynda olardy ýákiletti organnyń sıfrlyq júıesinde tirkeý mindeti engiziledi.
Mınıstrlik bul ózgeristerdiń maqsaty barlyq talapkerler úshin teń jaǵdaı jasaý jáne el ekonomıkasyna qajetti básekege qabiletti mamandar daıarlaý ekenin atap ótti.
