Áleýmettik jelide «_khassanov» atymen belgili Áset esimdi bloger Atajurt ókilderiniń sotyna qatysty pikir bildirdi, dep habarlaidy Dalanews.kz.
Instagram-da jariialaǵan videosynda bloger bul áreketterdiń artynda dál qazir Amerikada júrgen Serikjan Bilásh turǵanyn aitady.
«Bul keńinen taralyp jatqan úlken másele. Áleýmettik jelilerden barlyqtaryńyz da kórgen bolarsyzdar dep oilaimyn. Bul másele 19 qazaǵymyzdyń sottalýyna qatysty. Ne úshin olar sottalyp jatyr? Bir arandatýshy, iriń salýshy Serikjan Bilásh degen azamat bar. Sonyń sózine erip, bul kisiler basqa eldiń týyn jáne basshysynyń sýretin órtegen», – deidi bloger.
Sózin tarqata kele bloger Serikjan Biláshti synǵa alyp, mundai arandatýshylardyń ózderi áreketke eshqashan barmaitynyn, basyn qaterge múlde tikpeitinin, tek adamdardy aidap salýmen júretinin jetkizdi.
«Qazir ózi Amerika memleketinde eken. Qazir sol elde júrip, nege shyqpaidy ózi tý nemese sýretti órtep?! Mundailar ózderi shyǵa almaidy, olar tek basqalardyń miyn ýlaidy, biraq ózderi shyqpaidy», – dedi ol.
Sondai-aq, videoda bloger mundai zańǵa qaishy árekettiń saldaryna da toqtaldy. Onyń aitýynsha, arandatýshynyń sózine essiz erip, qylmys jasaǵan qazaqtardyń artynda ata-anasy, baýyry, kelinshekteri men balalary jylap qalǵan.
Sóz sońynda bloger árbir aqparatty syni kózqaraspen qabyldaýǵa jáne de arandatýshylardyń artynan ere bermeýge shaqyrdy.
«Meniń sizderge aitarym, dál osyndai jaǵdaiǵa túsip qalmaý úshin birinshi kezekte kimdi tyńdap jatsyz, kimdi qoldap jatsyz, kimniń aitqanyn istep jatsyz, sonyń barlyǵyn birinshi kezekte anyqtap bilip alyńyzdar», – túiindedi ol.
