Resei Qazaqstanmen shekarada ornalasqan ótkizý beketterin jańǵyrtýdy josparlap otyr. Bul týraly reseilik BAQ málimdedi, dep habarlaidy Dalanews.kz.
Málimetke sáikes, Resei Kólik ministri Andrei Nikitin Orynbor oblysynyń gýbernatory Evgenii Solntsevpen kezdesý ótkizip, óńirdiń kólik infraqurylymyn damytý máselelerin talqylaǵan. Jiyn barysynda aimaqtaǵy shekaralyq ótkizý beketterin jańartý máselesine erekshe nazar aýdarǵan.
Atap aitqanda, basym baǵyttaǵy ótkizý pýnktteriniń tizimine engen Sagarchin avtomobil ótkizý beketinde aýqymdy jóndeý jumystary júrgiziledi. Joba aiasynda infraqurylym tolyq jańartylyp, memlekettik baqylaý organdaryna arnalǵan modýldi ǵimarattar ornatylady. Bul jumystardy 2028 jylǵa deiin aiaqtaý josparlanǵan.
Jańǵyrtý nátijesinde ótkizý jolaǵynyń sany úshten onǵa deiin kóbeiedi. Sonymen qatar júk kólikterin tekserýge arnalǵan zamanaýi inspektsiialyq keshender ornatylady. Sonyń arqasynda bir júk kóligin tekserý ýaqyty 10 minýttan aspaýy tiis.
Budan bólek, Iletsk-1 temirjol ótkizý beketin jańǵyrtý jumystary da jalǵasyp jatyr. Qazirgi ýaqytta josparlanǵan 26 sharanyń 18-i oryndalǵan. Onyń ishinde beinebaqylaý jáne baqylaý júieleri ornatylyp, qorshaýlar jańartylǵan, memlekettik organdarǵa arnalǵan blok-modýlder, jylytý beketteri men pasporttyq baqylaý kabinalary iske qosylǵan.
Sondai-aq rezervtik elektrmen qamtý júiesiniń jobasy ázirlenip, kúzet dabyly júiesi ornatylǵan. Al 2026 jyly taǵy alty sharany júzege asyrý josparlanyp otyr.
