رەسەي قازاقستانمەن شەكارادا ورنالاسقان وتكىزۋ بەكەتتەرىن جاڭعىرتۋدى جوسپارلاپ وتىر. بۇل تۋرالى رەسەيلىك ب ا ق مالىمدەدى، دەپ حابارلايدى Dalanews.kz.
مالىمەتكە سايكەس، رەسەي كولىك ءمينيسترى اندرەي نيكيتين ورىنبور وبلىسىنىڭ گۋبەرناتورى ەۆگەنيي سولنسيەۆپەن كەزدەسۋ وتكىزىپ، ءوڭىردىڭ كولىك ينفراقۇرىلىمىن دامىتۋ ماسەلەلەرىن تالقىلاعان. جيىن بارىسىندا ايماقتاعى شەكارالىق وتكىزۋ بەكەتتەرىن جاڭارتۋ ماسەلەسىنە ەرەكشە نازار اۋدارعان.
اتاپ ايتقاندا، باسىم باعىتتاعى وتكىزۋ پۋنكتتەرىنىڭ تىزىمىنە ەنگەن ساگارچين اۆتوموبيل وتكىزۋ بەكەتىندە اۋقىمدى جوندەۋ جۇمىستارى جۇرگىزىلەدى. جوبا اياسىندا ينفراقۇرىلىم تولىق جاڭارتىلىپ، مەملەكەتتىك باقىلاۋ ورگاندارىنا ارنالعان ءمودۋلدى عيماراتتار ورناتىلادى. بۇل جۇمىستاردى 2028 جىلعا دەيىن اياقتاۋ جوسپارلانعان.
جاڭعىرتۋ ناتيجەسىندە وتكىزۋ جولاعىنىڭ سانى ۇشتەن ونعا دەيىن كوبەيەدى. سونىمەن قاتار جۇك كولىكتەرىن تەكسەرۋگە ارنالعان زاماناۋي ينسپەكسيالىق كەشەندەر ورناتىلادى. سونىڭ ارقاسىندا ءبىر جۇك كولىگىن تەكسەرۋ ۋاقىتى 10 مينۋتتان اسپاۋى ءتيىس.
بۇدان بولەك، يلەسك-1 تەمىرجول وتكىزۋ بەكەتىن جاڭعىرتۋ جۇمىستارى دا جالعاسىپ جاتىر. قازىرگى ۋاقىتتا جوسپارلانعان 26 شارانىڭ 18ء-ى ورىندالعان. ونىڭ ىشىندە بەينەباقىلاۋ جانە باقىلاۋ جۇيەلەرى ورناتىلىپ، قورشاۋلار جاڭارتىلعان، مەملەكەتتىك ورگاندارعا ارنالعان بلوك-مودۋلدەر، جىلىتۋ بەكەتتەرى مەن پاسپورتتىق باقىلاۋ كابينالارى ىسكە قوسىلعان.
سونداي-اق رەزەرۆتىك ەلەكترمەن قامتۋ جۇيەسىنىڭ جوباسى ازىرلەنىپ، كۇزەت دابىلى جۇيەسى ورناتىلعان. ال 2026 جىلى تاعى التى شارانى جۇزەگە اسىرۋ جوسپارلانىپ وتىر.
