Qazaqstanda turýǵa yqtiiarhat alǵysy keletin shetel azamattaryna qoiylatyn talap kúsheiýi múmkin. Endi olar qazaq tilin belgili bir deńgeide meńgergenin dáleldeýi tiis, dep habarlaidy Dalanews.kz.
Jańa tártipke sáikes, elde turaqty turýǵa nietti shetel azamattary qazaq tilin keminde B2 deńgeiinde bilýi kerek. Bul talap turýǵa yqtiiarhat alý rásiminiń mindetti sharttarynyń birine ainalýy múmkin.
Áleýmettik jelilerde keibir shetel azamattary osy talapqa bailanysty QAZTEST emtihanyn tapsyryp jatqanyn aityp, nátijelerin jariialai bastaǵan.
Jeli qoldanýshylary muny Qazaqstannyń kóshi-qon saiasaty men memlekettik tildiń mártebesin arttyrý baǵytyndaǵy qadam retinde baǵalap jatyr.
Ministrlik qandai málimdeme jasady?
Aita keteiik, kúni keshe Premer-ministrdiń orynbasary – Mádeniet jáne aqparat ministri Aida Balaeva yqtiiarhat alý úshin sheteldikterge jańa erejeler engiziletinin málimdegen edi. Onyń aitýynsha, jańa ózgerister 2030 jylǵa deiingi kóshi-qon saiasaty tujyrymdamasy aiasynda júzege asyrylady.
Ministrdiń sózinshe, endi Qazaqstanǵa keletin sheteldikterge qoiylatyn talaptar naqtylanyp, irikteý tártibi qatańdai túsedi. Sonyń ishinde elde turaqty turýǵa nietti azamattar memlekettik tildi belgili bir deńgeide meńgergenin rastaýy qajet.
"Bul – halyqaralyq tájiribede bar qalypty talap. Kóptegen memlekette turýǵa ruqsat alý úshin sol eldiń tilin bilý mindetteledi", - dedi Aida Balaeva.
Sondai-aq 2026 jyldyń qańtarynan bastap Qazaqstanda migranttardy baǵalaýdyń jańa júiesi iske qosylady. Bul júie boiynsha shetel azamattary qazaq tilinen test tapsyryp, arnaiy saýalnamadan ótedi, memlekettik organdar tekserisinen keiin áńgimelesýge shaqyrylady.
Ministrdiń aitýynsha, bul sharalar kóshi-qon salasyndaǵy ashyqtyqty arttyryp, zańsyz áreketterdiń aldyn alýǵa baǵyttalǵan.
"Biz úshin eń bastysy – Qazaqstan azamattarynyń múddesi. Sondyqtan sheteldik jumys kúshi tek elde maman jetispegen jaǵdaida ǵana tartylady", - dep atap ótti ministr.
Budan bólek, etnikalyq qazaqtarǵa arnalǵan talaptar da qarastyrylǵan. Memlekettik qoldaý alý úshin qandastar arnaiy mártebe rásimdep, eńbek kúshi tapshy óńirlerge qonystanýy tiis.
Jalpy, jańa kóshi-qon saiasaty eldegi tártipti kúsheitip, qaýipsizdikti qamtamasyz etýge jáne kóshi-qon úderisin tiimdi basqarýǵa baǵyttalǵan. Basty talap – zań bárine birdei ortaq bolýy tiis.
