قازاقستاندا تۇرۋعا ىقتيارحات العىسى كەلەتىن شەتەل ازاماتتارىنا قويىلاتىن تالاپ كۇشەيۋى مۇمكىن. ەندى ولار قازاق ءتىلىن بەلگىلى ءبىر دەڭگەيدە مەڭگەرگەنىن دالەلدەۋى ءتيىس، دەپ حابارلايدى Dalanews.kz.
جاڭا تارتىپكە سايكەس، ەلدە تۇراقتى تۇرۋعا نيەتتى شەتەل ازاماتتارى قازاق ءتىلىن كەمىندە B2 دەڭگەيىندە ءبىلۋى كەرەك. بۇل تالاپ تۇرۋعا ىقتيارحات الۋ ءراسىمىنىڭ مىندەتتى شارتتارىنىڭ بىرىنە اينالۋى مۇمكىن.
الەۋمەتتىك جەلىلەردە كەيبىر شەتەل ازاماتتارى وسى تالاپقا بايلانىستى قازتەست ەمتيحانىن تاپسىرىپ جاتقانىن ايتىپ، ناتيجەلەرىن جاريالاي باستاعان.
جەلى قولدانۋشىلارى مۇنى قازاقستاننىڭ كوشى-قون ساياساتى مەن مەملەكەتتىك ءتىلدىڭ مارتەبەسىن ارتتىرۋ باعىتىنداعى قادام رەتىندە باعالاپ جاتىر.
مينيسترلىك قانداي مالىمدەمە جاسادى؟
ايتا كەتەيىك، كۇنى كەشە پرەمەر-مينيستردىڭ ورىنباسارى – مادەنيەت جانە اقپارات ءمينيسترى ايدا بالايەۆا ىقتيارحات الۋ ءۇشىن شەتەلدىكتەرگە جاڭا ەرەجەلەر ەنگىزىلەتىنىن مالىمدەگەن ەدى. ونىڭ ايتۋىنشا، جاڭا وزگەرىستەر 2030 جىلعا دەيىنگى كوشى-قون ساياساتى تۇجىرىمداماسى اياسىندا جۇزەگە اسىرىلادى.
ءمينيستردىڭ سوزىنشە، ەندى قازاقستانعا كەلەتىن شەتەلدىكتەرگە قويىلاتىن تالاپتار ناقتىلانىپ، ىرىكتەۋ ءتارتىبى قاتاڭداي تۇسەدى. سونىڭ ىشىندە ەلدە تۇراقتى تۇرۋعا نيەتتى ازاماتتار مەملەكەتتىك ءتىلدى بەلگىلى ءبىر دەڭگەيدە مەڭگەرگەنىن راستاۋى قاجەت.
"بۇل – حالىقارالىق تاجىريبەدە بار قالىپتى تالاپ. كوپتەگەن مەملەكەتتە تۇرۋعا رۇقسات الۋ ءۇشىن سول ەلدىڭ ءتىلىن ءبىلۋ مىندەتتەلەدى"، - دەدى ايدا بالايەۆا.
سونداي-اق 2026 جىلدىڭ قاڭتارىنان باستاپ قازاقستاندا ميگرانتتاردى باعالاۋدىڭ جاڭا جۇيەسى ىسكە قوسىلادى. بۇل جۇيە بويىنشا شەتەل ازاماتتارى قازاق تىلىنەن تەست تاپسىرىپ، ارنايى ساۋالنامادان وتەدى، مەملەكەتتىك ورگاندار تەكسەرىسىنەن كەيىن اڭگىمەلەسۋگە شاقىرىلادى.
ءمينيستردىڭ ايتۋىنشا، بۇل شارالار كوشى-قون سالاسىنداعى اشىقتىقتى ارتتىرىپ، زاڭسىز ارەكەتتەردىڭ الدىن الۋعا باعىتتالعان.
"ءبىز ءۇشىن ەڭ باستىسى – قازاقستان ازاماتتارىنىڭ مۇددەسى. سوندىقتان شەتەلدىك جۇمىس كۇشى تەك ەلدە مامان جەتىسپەگەن جاعدايدا عانا تارتىلادى"، - دەپ اتاپ ءوتتى مينيستر.
بۇدان بولەك، ەتنيكالىق قازاقتارعا ارنالعان تالاپتار دا قاراستىرىلعان. مەملەكەتتىك قولداۋ الۋ ءۇشىن قانداستار ارنايى مارتەبە راسىمدەپ، ەڭبەك كۇشى تاپشى وڭىرلەرگە قونىستانۋى ءتيىس.
جالپى، جاڭا كوشى-قون ساياساتى ەلدەگى ءتارتىپتى كۇشەيتىپ، قاۋىپسىزدىكتى قامتاماسىز ەتۋگە جانە كوشى-قون ۇدەرىسىن ءتيىمدى باسقارۋعا باعىتتالعان. باستى تالاپ – زاڭ بارىنە بىردەي ورتاق بولۋى ءتيىس.
