Qazaqstanda aldaǵy ýaqytta jańa saiasi partiialar paida bolýy múmkin, dep habarlaidy Dala News.
Bul týraly Senat tóraǵasy Maýlen Áshimbaev kýlýarda málimdedi.
Onyń aitýynsha, azamattardyń saiasi partiialar qurýǵa quqyǵy bar jáne bul úderis zań talaptaryna sai júzege asýy tiis.
«Azamattar qoǵamdyq uiymdar men saiasi partiialar qura alady. Eń bastysy - zań talaptaryna sáikes bolý, qajetti rásimderdi oryndaý, qol jinaý jáne basqa da talaptardy saqtaý», – dedi Áshimbaev.
Senat spikeri qazirgi sailaý júiesindegi ózgerister bul úderisti jedeldetetinin atap ótti.
«Biz parlamentti tolyqtai partiialyq tizimder arqyly sailaý júiesine óttik. Bul sheshimder partiialyq júieniń damýyna jáne jańa partiialardyń paida bolýyna qýatty serpin beredi», – dedi ol.
Áshimbaevtyń pikirinshe, eldiń damýy úshin saiasi partiialar arasynda básekelestik bolýy asa mańyzdy.
«Jańa partiialardyń paida bolýy, qoldanystaǵy partiialardyń tek sailaý kezinde ǵana emes, turaqty túrde belsendi bolýy, Qazaqstannyń damýy úshin mańyzdy. Qoǵamdaǵy túrli toptardyń pikirleri zań shyǵarýshy organda kórinis tabýy kerek», – dedi ol.
Sondai-aq spiker partiialar arasyndaǵy básekelestiktiń el damýyna oń áser etetinin atap ótti.
«Jańa partiialar paida bolsyn, básekelestik bolsyn. Ár partiia óz baǵdarlamasynyń suranysqa ie ekenin dáleldeýi kerek. Partiialyq básekelestik tek paida ákeledi dep oilaimyn», – dedi Áshimbaev.
