Abai oblysynda energetikalyq infraqurylymdy damytý aiasynda Semei qalasynda jańa jylý elektr ortalyǵy – JEO-3 qurylysy qolǵa alyndy. Nysan Reseidiń qatysýynsyz júzege asyrylyp jatyr, dep habarlaidy Dalanews.kz.
«Samuryq-Qazyna» qorynyń basshysy Nurlan Jaqypov pen Abai oblysynyń ákimi Berik Ýáli Stepnoi kentindegi qurylys alańyna baryp, jobanyń bastalý barysymen tanysty. Qurylys jumystary 2026 jyldyń sáýir aiynda bastalǵan, al stantsiiany iske qosý 2029 jyldyń jeltoqsanyna josparlanǵan.
Joba parametrlerine sáikes, stantsiianyń elektr qýaty 405 MVt, al jylý qýaty saǵatyna 1000 Gkal bolady. Otyn retinde Qarajyra ken ornynyń kómiri paidalanylady. Nysanda árqaisysynyń ónimdiligi saǵatyna 650 tonna bolatyn 4 bý qazandyǵy jáne qýaty 135 MVt-tan 3 týrbogenerator ornatylady. Jalpy aýmaǵy shamamen 190 gektardy qamtidy.
Energetika ministrligi men «Semei Energo» JShS arasynda joba boiynsha kelisimshart 2025 jyldyń qazan aiynda jasalǵan. Al 2026 jyldyń qańtarynda jobalaý jáne qurylys jumystaryn qamtityn EPC-kelisim bekitilgen.
Berik Ýáli jańa JEO-3 óńirdegi energiia tapshylyǵyn joiyp, turǵyndardy turaqty jylýmen qamtamasyz etetinin atap ótti. Onyń aitýynsha, bul joba Semei úshin asa mańyzdy infraqurylymdyq sheshimderdiń biri.
Óz kezeginde Nurlan Jaqypov nysandy strategiialyq joba dep atap, munda «taza kómir» tehnologiialary men ziiandy shyǵaryndylardy azaitatyn gaz tazartý júieleri engiziletinin aitty.
Qazirgi tańda Semeidiń sol jaǵalaýynda 2 jylý kózi jumys istese, oń jaǵalaýynda 18 jylý kózi bar.
