Tótenshe jaǵdai kezinde qutqarý qyzmetteriniń kedergisiz jumys isteýi úshin arnaiy mehanizmder qajet, dep habarlaidy Dala News.
Bul týraly Senat tóraǵasy Maýlen Áshimbaev kýlýarda málimdedi.
Onyń aitýynsha, jaqynda bolǵan qaiǵyly oqiǵa bul máseleniń ózektiligin kórsetti.
«Tragediia boldy, balalar qaza tapty. Osyǵan bailanysty tótenshe jaǵdai kezinde tiisti qyzmetterdiń óz mindetterin kedergisiz oryndaýy úshin naqty mehanizmder qajet», – dedi Áshimbaev.
Spikerdiń sózinshe, mundai jaǵdaida adamnyń ómiri men qaýipsizdigi birinshi orynda turýy tiis.
«Munda belgili bir niýanstar bar, bul azamattardyń jeke múlki. Biraq adam ómiri, qaýipsizdik, densaýlyq máselesi kóterilgende, tiisti qyzmetterdiń esh kedergisiz áreket etýine múmkindik beretin tetikter bolýy kerek», – dedi ol.
Áshimbaev bul máselede zańnamalyq ózgerister qajet bolýy múmkin ekenin atap ótti.
Sonymen qatar, ol mundai normalar naqty ári anyq jazylýy tiis ekenin aitty.
«Eger zań qabyldanatyn bolsa, onda onyń ishinde mundai tetikterdiń qai jaǵdaida jáne qalai qoldanylatyny naqty kórsetilýi kerek. Bul óte mańyzdy másele jáne jan-jaqty qarastyrýdy qajet etedi», – dedi Senat tóraǵasy.
Onyń pikirinshe, bul baǵytta belgili bir ózgerister engizý qajet.
