Alataýdyń asqar shyńdaryna ińkárlene qaraǵan jan, onyń baýraiynda tunyp turǵan talai taǵdyr baryn ańǵara bermes. Sol taǵdyrlardyń toǵysqan bir mekeni – «Alataý» dástúrli óner teatry. Bul shańyraqta óner ǵana emes, júrektiń de óz úni, óz shyndyǵy bar. Sahnada aitylǵan ár sóz, ár áýen, ár qimyl – adam janynyń ainasy ispetti. Al sol ainaǵa úńilgen jandar keide óz syńaryn da osy jerden tabady. On jyl ishinde bul orda bes birdei shańyraqtyń keregesin keńeitip, bes taǵdyrdy bir arnaǵa toǵystyrdy. Qozy Kórpesh – Baian sulý kúniniń qarsańynda bul hikaialar tipti de júrekke jaqyn estiledi, dep habarlaidy Dalanews.kz.
Aibek pen Aigerimniń kezdesýi – jazdyń jaima-shýaq bir kúnindei ańdaýsyz bastalǵan áser. 2020 jyldyń maýsymynda sahna ústinde bir sát kózge túsken beine, kóńildiń bir túkpirine jaryq sáýle túsirgendei boldy. «Abai-Toǵjan» qoiylymynyń qarbalas daiyndyǵy olardy bir-birine jaqyndatyp, beine bir eki ózenniń bir arnaǵa quiylǵanyndai sezimge jeteledi. Áýelde jai ǵana áriptestik áńgime edi, keiin ol syrǵa, syrdan – saǵynyshqa ulasty. Aibek júregindegi otty jasyra almai, dostary arqyly jol taýyp, yqylasyn bildirdi. 2021 jyldyń kókteminde búr jarǵan bul sezim jyldar óte tamyryn tereńge jiberip, 2024 jyldyń kúzine qarai máýeli báiterekke ainaldy. Búginde sol báiterektiń saiasynda sábi kúlkisi syńǵyrlap tur.
Osy bir názik sezimniń órbýine kýá bolǵan taǵdyrlas jandar – Nurbolat pen Saýle. Olardyń mahabbaty da asyqpai tógilgen kúidei baiaý bastaldy. Sol bir «Abai-Toǵjan» qoiylymynyń aiasynda tanysyp, bir-birine jaqyndai túsken qos júrek Nurbolattyń týǵan kún keshinde tipti jaqyn tanysty. Áńgime órbigen saiyn, kóńildiń de qaqpasy aiqara ashylǵandai boldy. Úsh jylǵa sozylǵan bul sezim ýaqyt synynan súrinbei ótip, 2025 jyly shańyraq kóterýmen túiindeldi.
Bul eki juptyń arasynda kózge kórinbes, biraq júrekpen seziler bailanys bar. Aibek pen Nurbolat – bala kúnnen tanys dostar bolsa, Aigerim men Saýle óner jolynda qatar shyńdalǵan, bir oqý ornynda bilim alǵan jandar. Teatr qabyrǵasynda bul tórteý tek áriptes emes, bir-birine tileýles, syrlas janǵa ainaldy. Qos-qostan serýendep, ortaq qýanysh pen áserdi bólisý – olardyń bailanysyn bekite tústi. Biriniń sezimi búr jarsa, ekinshisi soǵan kýá bolyp, birge qýandy. Osylaisha eki mahabbat hikaiasy bir órnektiń qos jibindei qatar órildi.
Al Aidos pen Aidananyń joly – únsiz bastalyp, kúrt ózgeriske toly áńgime. Alǵashqyda alystan ǵana súisingen kóńil uzaq ýaqyt boiy ishte buǵyp jatty. Teatr sahnasyndaǵy ár kezdesý, árbir ortaq shara – onyń júregindegi sezimdi terbete tústi. Biraq taǵdyrdyń óz ýaqyty bar. 2023 jyly bir keshtiń sátinde bastalǵan tanystyq jańa bir ómirdiń esigin ashqandai boldy. Bir aiǵa jeter-jetpes ýaqytta olardyń áńgimesi úzilmeitin arnaǵa ainaldy. Alǵashqy kezdesýdiń ózi – tabiǵat aiasynda, taza aýamen tynystap, erkin syrlasý – jan dúnielerin jaqyndatty. Batyl sheshim qabyldandy, sezimge senim qosyldy. Toǵyz ai ishinde qos áýlet tabysyp, jańa shańyraq kóterildi. Qazir egiz uldyń kúlkisi sol bir únsiz bastalǵan sezimniń aiǵaǵy ispetti.
Dias pen Tomiristiń mahabbaty – lap etken jalyn sekildi. 2022 jyldyń kúzi olar úshin tek mezgil aýysýy emes, júrek kúiiniń ózgerýi boldy. Dostyqtyń názik jibi bir sátte mahabbattyń berik arqanyndai beki tústi. Tomiristiń týǵan kúni – taǵdyrdyń sheshýshi sátine ainaldy: sol kúni aitylǵan sóz, taǵylǵan saqina – bári jańa ómirdiń bastaýyndai edi. Sol kúnnen keiin olar úshin ýaqyttyń ózi basqa yrǵaqpen soqqandai boldy. Bir kún kórmese, bir álem kemigendei sezim, birge ótken ár sáttiń qadiri – olardyń bailanysyn burynǵydan da tereń etti. 2023 jyly jasalǵan usynys – sol sezimniń zańdy jalǵasy. Qazir olar ata-ana atanyp, mahabbattyń shyn máninde ómirge ainalǵanyn dáleldep otyr.
Erqanat pen Quralaidyń hikaiasy – baiqalmai bastalǵanymen, júrekte tereń iz qaldyrǵan taǵdyr. 2022 jylǵy «Aiman – Sholpan» qoiylymynyń qarbalasy kezinde alǵash kózge túsken tanystyq bastapqyda mánsiz kóringendei edi. Biraq kún saiynǵy júzdesý, ortaq dastarqan basyndaǵy áńgime, uzaq gastroldik saparlar – bári-bári júrekterdi bir-birine jaqyndata tústi. Erqanattyń únsiz iltipaty, baiqatpai jasaǵan qamqorlyǵy Quralaidyń kóńilinde jylylyq uialatty. Semei saparyndaǵy bir aýyz sóz – ázilge uqsas tilek – keiin taǵdyrdyń shyndyqqa ainalǵan isharasy boldy. Dostyqtyń názik jibi ýaqyt óte mahabbattyń berik arqaýyna ainalyp, olar da shańyraq kóterdi. Búginde olardyń ómiri bala kúlkisimen ajarlanyp tur.
Bul bes taǵdyr – bes bólek áýen. Biri baiaý tógilgen kúidei, biri lapyldaǵan jalyndai, biri tereń tolqyndai. Biraq barlyǵynyń bastaýy bir – shynaiy sezim. Ónerdiń ishinde týǵan yqylas jasandylyqtan ada, sondyqtan da máńgilikke ulasýǵa beiim.
Júrekke júgingen jan ǵana tirshiliktiń shyn mánin tereńnen tani alady. Al osy teatr qabyrǵasynda búr jarǵan mahabbattar – sol shyndyqtyń únsiz dáleli. Munda sahnadaǵy ról aiaqtalǵanymen, ómirdegi ról endi ǵana bastalady.
On jyl – ýaqyttyń ólshemi ǵana emes, sezimniń shejiresi. Toǵysqan taǵdyrlar, tabylǵan baqyt, jalǵasqan ómirler – bári osy shańyraqtyń tarihyna ainalǵan. Al «Alataý» dástúrli óner teatry áli talai júrektiń únin estip, talai mahabbattyń kýási bolary sózsiz.
Aýbakirova Inara
