Qazaqstan Respýblıkasy Prezıdenti Qasym-Jomart Toqaevtyń bastamasymen respýblıka aýmaǵynda júzege asyrylyp jatqan jalpyulttyq «Taza Qazaqstan» ekologıalyq mádenıetti damytý tujyrymdamasy aıasynda Almaty oblysy Qonaev qalasynda saltanatty is-shara ótti, dep habarlaıdy Dala News.
Atalǵan is-sharanyń basty maqsaty – jas urpaq arasynda turmystyq qaldyqtardy bólek jınaý, suryptaý jáne kádege jaratý daǵdylaryn qalyptastyrý, sondaı-aq ekologıalyq bilim men mádenıetti arttyrý boldy.
İs-shara barysynda EcoQolday sıfrlyq júıesi arqyly oqýshylarǵa qaldyqtardy basqarýdyń zamanaýı tásilderi túsindirildi. Joba sheńberinde qaladaǵy mektepterdiń oqýshylarymen, synyp jetekshilerimen, sondaı-aq bilim berý basqarmasy qyzmetkerlerimen kezdesýler uıymdastyryldy.
Ekologıalyq aǵartýshylyq baǵyttaǵy bul kezdesýlerdi S.Seıfýllın atyndaǵy Qazaq agrotehnıkalyq zertteý ýnıversıteti Ekologıa kafedrasynyń bilikti mamandary – profesor A.T. Qýatbaev jáne qaýymdastyrylǵan profesor N.A. Nýrbaeva ótkizdi.
Baǵdarlama aıasynda qatysýshylarǵa turmystyq qaldyqtardyń qorshaǵan ortaǵa áseri, olardyń túrleri, qaldyqtardy bólek jınaý joldary jáne qaıta óńdeý men kádege jaratý tásilderi týraly jan-jaqty aqparat berildi. Teorıalyq bilimmen qatar, praktıkalyq daǵdylardy qalyptastyrýǵa da erekshe kóńil bólindi.
Joba sheńberinde bilim berý jáne materıaldyq qamtamasyz etý baǵyttary da júıeli túrde iske asyryldy. Atap aıtqanda, Qonaev qalasyndaǵy 11 mektepte qaldyqtardy bólek jınaý úshin árqaısysy 3 konteınerden turatyn 66 jınaq ornatylyp, «qaǵaz/karton», «plasık», «shyny/metal» fraksıalary boıynsha jalpy sany 198 arnaıy konteıner ornalastyryldy.
Sonymen qatar, bilim berý qamtýy aıasynda 1230 oqýshy arnaıy oqytýdan ótip, bul keminde 10%-dyq nysanaly kórsetkishke sáıkes keldi. Budan bólek, 164 pedagogqa (19,1%) arnalǵan oqytý semınarlary uıymdastyryldy. Olardyń qatarynda bıologıa jáne geografıa páni muǵalimderi, synyp jetekshileri, tárbıe isi jónindegi orynbasarlar, tehnologtar men mektep dırektorlary boldy. Bul semınarlar mektepterde qatty turmystyq qaldyqtardy jınaý daǵdylaryn qalyptastyrýǵa jáne oqýshylardyń ekologıalyq jaýapkershiligin arttyrý jumystaryn jalǵastyrýǵa baǵyttaldy.
«Taza Qazaqstan» bastamasy – mektep oqýshylarynyń qorshaǵan ortaǵa uqypty qaraýyn qalyptastyrýǵa, turaqty tutyný mádenıetin damytýǵa jáne ulttyq ekologıalyq kún tártibin ilgeriletýge baǵyttalǵan mańyzdy joba bolyp tabylady. Uıymdastyrýshylar bul baǵyttaǵy jumystardyń aldaǵy ýaqytta da jalǵasatynyn atap ótti.
Jobanyń oryndaýshysy – Qazaqstan ekologıalyq qory boldy, al is-sharalar Qazaqstan Respýblıkasy Ekologıa jáne tabıǵı resýrstar mınıstrliginiń qoldaýymen júzege asyryldy.
