قازاقستان رەسپۋبليكاسى پرەزيدەنتى قاسىم-جومارت توقايەۆتىڭ باستاماسىمەن رەسپۋبليكا اۋماعىندا جۇزەگە اسىرىلىپ جاتقان جالپىۇلتتىق «تازا قازاقستان» ەكولوگيالىق مادەنيەتتى دامىتۋ تۇجىرىمداماسى اياسىندا الماتى وبلىسى قونايەۆ قالاسىندا سالتاناتتى ءىس-شارا ءوتتى، دەپ حابارلايدى Dala News.
اتالعان ءىس-شارانىڭ باستى ماقساتى – جاس ۇرپاق اراسىندا تۇرمىستىق قالدىقتاردى بولەك جيناۋ، سۇرىپتاۋ جانە كادەگە جاراتۋ داعدىلارىن قالىپتاستىرۋ، سونداي-اق ەكولوگيالىق ءبىلىم مەن مادەنيەتتى ارتتىرۋ بولدى.
ءىس-شارا بارىسىندا EcoQolday سيفرلىق جۇيەسى ارقىلى وقۋشىلارعا قالدىقتاردى باسقارۋدىڭ زاماناۋي تاسىلدەرى ءتۇسىندىرىلدى. جوبا شەڭبەرىندە قالاداعى مەكتەپتەردىڭ وقۋشىلارىمەن، سىنىپ جەتەكشىلەرىمەن، سونداي-اق ءبىلىم بەرۋ باسقارماسى قىزمەتكەرلەرىمەن كەزدەسۋلەر ۇيىمداستىرىلدى.
ەكولوگيالىق اعارتۋشىلىق باعىتتاعى بۇل كەزدەسۋلەردى س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى ەكولوگيا كافەدراسىنىڭ بىلىكتى ماماندارى – پروفەسسور ا.ت. قۋاتبايەۆ جانە قاۋىمداستىرىلعان پروفەسسور ن.ا. نۋربايەۆا وتكىزدى.
باعدارلاما اياسىندا قاتىسۋشىلارعا تۇرمىستىق قالدىقتاردىڭ قورشاعان ورتاعا اسەرى، ولاردىڭ تۇرلەرى، قالدىقتاردى بولەك جيناۋ جولدارى جانە قايتا وڭدەۋ مەن كادەگە جاراتۋ تاسىلدەرى تۋرالى جان-جاقتى اقپارات بەرىلدى. تەوريالىق بىلىممەن قاتار، پراكتيكالىق داعدىلاردى قالىپتاستىرۋعا دا ەرەكشە كوڭىل ءبولىندى.
جوبا شەڭبەرىندە ءبىلىم بەرۋ جانە ماتەريالدىق قامتاماسىز ەتۋ باعىتتارى دا جۇيەلى تۇردە ىسكە اسىرىلدى. اتاپ ايتقاندا، قونايەۆ قالاسىنداعى 11 مەكتەپتە قالدىقتاردى بولەك جيناۋ ءۇشىن ءارقايسىسى 3 كونتەينەردەن تۇراتىن 66 جيناق ورناتىلىپ، «قاعاز/كارتون»، «پلاستيك»، «شىنى/مەتالل» فراكسيالارى بويىنشا جالپى سانى 198 ارنايى كونتەينەر ورنالاستىرىلدى.
سونىمەن قاتار، ءبىلىم بەرۋ قامتۋى اياسىندا 1230 وقۋشى ارنايى وقىتۋدان ءوتىپ، بۇل كەمىندە 10%-دىق نىسانالى كورسەتكىشكە سايكەس كەلدى. بۇدان بولەك، 164 پەداگوگقا (19،1%) ارنالعان وقىتۋ سەمينارلارى ۇيىمداستىرىلدى. ولاردىڭ قاتارىندا بيولوگيا جانە گەوگرافيا ءپانى مۇعالىمدەرى، سىنىپ جەتەكشىلەرى، تاربيە ءىسى جونىندەگى ورىنباسارلار، تەحنولوگتار مەن مەكتەپ ديرەكتورلارى بولدى. بۇل سەمينارلار مەكتەپتەردە قاتتى تۇرمىستىق قالدىقتاردى جيناۋ داعدىلارىن قالىپتاستىرۋعا جانە وقۋشىلاردىڭ ەكولوگيالىق جاۋاپكەرشىلىگىن ارتتىرۋ جۇمىستارىن جالعاستىرۋعا باعىتتالدى.
«تازا قازاقستان» باستاماسى – مەكتەپ وقۋشىلارىنىڭ قورشاعان ورتاعا ۇقىپتى قاراۋىن قالىپتاستىرۋعا، تۇراقتى تۇتىنۋ مادەنيەتىن دامىتۋعا جانە ۇلتتىق ەكولوگيالىق كۇن ءتارتىبىن ىلگەرىلەتۋگە باعىتتالعان ماڭىزدى جوبا بولىپ تابىلادى. ۇيىمداستىرۋشىلار بۇل باعىتتاعى جۇمىستاردىڭ الداعى ۋاقىتتا دا جالعاساتىنىن اتاپ ءوتتى.
جوبانىڭ ورىنداۋشىسى – قازاقستان ەكولوگيالىق قورى بولدى، ال ءىس-شارالار قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگىنىڭ قولداۋىمەن جۇزەگە اسىرىلدى.
