16 sáýir kúni Almatyda tolassyz jaýǵan jańbyr saldarynan qala kóshelerin sý basyp, birqatar aýmaqta qozǵalys qiyndady, dep habarlaidy Dalanews.kz.
ZTB news telegram arnasy áleýmettik jelilerde taraǵan videolardy bólisti. Onda joldardyń úlken shalshyqqa ainalǵany baiqalady. Kólikter men jaiaý júrginshiler qozǵalysy da aitarlyqtai qiyndaǵan.
"Qala turǵyndary jaǵdaidy ázilge ainaldyryp, "lastamen júrý kerek" dep jazyp jatyr", - deidi derekkóz.
Qala ákimdiginiń málimetinshe, qolaisyz aýa raiy aldyn ala belgili bolǵan. Osyǵan bailanysty kommýnaldyq qyzmetter kúsheitilgen rejimde jumys istegen. Qosymsha arnaiy tehnika men jumys kúshi jumyldyrylǵan.
Resmi derekke sáikes, 75 jedel brigada qurylyp, oǵan 425 jol jumysshysy tartylǵan. Sondai-aq 2300 qap qum daiyndalǵan. Jalpy táýlik ishinde jumystarǵa 2700-den astam adam qatysqan.
"Almaty tazalyq" mekemesi men merdiger uiymdarda táýlik boiy kezekshilik uiymdastyrylyp, qutqarý qyzmetteri de kúsheitilgen rejimde jumys istegen.
Aldyn ala aqparat boiynsha, sý basý saldarynan zardap shekkender tirkelmegen.
