Qazaqstanda azamattarǵa tegin meditsinalyq kómektiń kepildendirilgen kólemi aiasynda berilýi tiis 4 114 dári-dármektiń zańsyz satylǵany anyqtaldy. Bul týraly Densaýlyq saqtaý ministrligi málimdedi, dep habarlaidy Dalanews.kz.
Vedomstvo málimetinshe, dárilik zattardyń ainalymyna 2024 jyldyń 1 shildesinen bastap engizilgen tańbalaý júiesi arqyly taldaý júrgizilgen. "Tańbalanǵan taýarlardyń elektrondyq qujat ainalymy ortalyǵy" analitikalyq platformasynyń derekterine sáikes, respýblika boiynsha birqatar dárihanada tegin taratylýy tiis dárilerdiń satylǵany tirkelgen.
Ministrlik júrgizgen tekserýler nátijesinde 74 nysan qamtylyp, sonyń ishinde 31 uiymǵa jalpy somasy 12,3 mln teńge kóleminde aiyppul salynǵan. Al 43 mekemege anyqtalǵan zańbuzýshylyqtardy joiý týraly nusqama berilgen.
Tekserý barysynda TMKKK aiasynda naýqastarǵa berilgen dárilerdiń zańsyz saýdaǵa túskeni anyqtalǵan. Kei jaǵdailarda meditsinalyq uiymdar arqyly taratylǵan preparattar dárihana jelilerine qaita ótkizilgen. Anyqtalǵan dáriler qatarynda natrii hloridi men gliýkoza eritindileri, keibir antibiotikter jáne sozylmaly aýrýlardy emdeýge arnalǵan preparattar bar.
Sonymen qatar "Tsifrlyq ekonomikany damytý ortalyǵy" JShS derekterine sáikes, tańbalaý kodtaryn paidalaný barysynda júieli zańbuzýshylyqtar tirkelgen. Atap aitqanda, 35 537 ret dárilerdi ainalymnan qaita shyǵarý faktisi, bir kodty ártúrli qatysýshynyń 480 752 ret qoldanýy jáne 1 140 nysannyń 15 614 kodty qaita ainalymnan shyǵarǵany anyqtalǵan.
Ministrlik málimetinshe, atalǵan faktiler boiynsha materialdar Qarjylyq monitoring agenttigine jáne Ulttyq qaýipsizdik komitetiniń sybailas jemqorlyqqa qarsy qyzmetine joldanǵan. Qazirgi ýaqytta qosymsha tekserýler júrgizilip, bul baǵyttaǵy jumystar jalǵasyp jatyr.
