قازاقستاندا ازاماتتارعا تەگىن مەديسينالىق كومەكتىڭ كەپىلدەندىرىلگەن كولەمى اياسىندا بەرىلۋى ءتيىس 4 114 دارى-دارمەكتىڭ زاڭسىز ساتىلعانى انىقتالدى. بۇل تۋرالى دەنساۋلىق ساقتاۋ مينيسترلىگى مالىمدەدى، دەپ حابارلايدى Dalanews.kz.
ۆەدومستۆو مالىمەتىنشە، دارىلىك زاتتاردىڭ اينالىمىنا 2024 جىلدىڭ 1 شىلدەسىنەن باستاپ ەنگىزىلگەن تاڭبالاۋ جۇيەسى ارقىلى تالداۋ جۇرگىزىلگەن. "تاڭبالانعان تاۋارلاردىڭ ەلەكتروندىق قۇجات اينالىمى ورتالىعى" اناليتيكالىق پلاتفورماسىنىڭ دەرەكتەرىنە سايكەس، رەسپۋبليكا بويىنشا ءبىرقاتار ءدارىحانادا تەگىن تاراتىلۋى ءتيىس دارىلەردىڭ ساتىلعانى تىركەلگەن.
مينيسترلىك جۇرگىزگەن تەكسەرۋلەر ناتيجەسىندە 74 نىسان قامتىلىپ، سونىڭ ىشىندە 31 ۇيىمعا جالپى سوماسى 12،3 ملن تەڭگە كولەمىندە ايىپپۇل سالىنعان. ال 43 مەكەمەگە انىقتالعان زاڭبۇزۋشىلىقتاردى جويۋ تۋرالى نۇسقاما بەرىلگەن.
تەكسەرۋ بارىسىندا تمككك اياسىندا ناۋقاستارعا بەرىلگەن دارىلەردىڭ زاڭسىز ساۋداعا تۇسكەنى انىقتالعان. كەي جاعدايلاردا مەديسينالىق ۇيىمدار ارقىلى تاراتىلعان پرەپاراتتار ءدارىحانا جەلىلەرىنە قايتا وتكىزىلگەن. انىقتالعان دارىلەر قاتارىندا ناتريي ءحلوريدى مەن گليۋكوزا ەرىتىندىلەرى، كەيبىر انتيبيوتيكتەر جانە سوزىلمالى اۋرۋلاردى ەمدەۋگە ارنالعان پرەپاراتتار بار.
سونىمەن قاتار "سيفرلىق ەكونوميكانى دامىتۋ ورتالىعى" ج ش س دەرەكتەرىنە سايكەس، تاڭبالاۋ كودتارىن پايدالانۋ بارىسىندا جۇيەلى زاڭبۇزۋشىلىقتار تىركەلگەن. اتاپ ايتقاندا، 35 537 رەت دارىلەردى اينالىمنان قايتا شىعارۋ فاكتىسى، ءبىر كودتى ءارتۇرلى قاتىسۋشىنىڭ 480 752 رەت قولدانۋى جانە 1 140 نىساننىڭ 15 614 كودتى قايتا اينالىمنان شىعارعانى انىقتالعان.
مينيسترلىك مالىمەتىنشە، اتالعان فاكتىلەر بويىنشا ماتەريالدار قارجىلىق مونيتورينگ اگەنتتىگىنە جانە ۇلتتىق قاۋىپسىزدىك كوميتەتىنىڭ سىبايلاس جەمقورلىققا قارسى قىزمەتىنە جولدانعان. قازىرگى ۋاقىتتا قوسىمشا تەكسەرۋلەر جۇرگىزىلىپ، بۇل باعىتتاعى جۇمىستار جالعاسىپ جاتىر.
