Prezident ekinshi «Ortalyq Aziia – Qytai» sammitine qatysty, - dep habarlaidy Dalanews.kz.
Memleket basshysy Ortalyq Aziia elderimen jan-jaqty yntymaqtastyqqa niet tanytqany úshin QHR Tóraǵasy Si Tszinpinge alǵys aitty. Sondai-aq Sammit jumysyna belsene atsalysyp, óńirlik yntymaqtastyqqa udaiy qoldaý kórsetip kele jatqan baýyrlas memleketterdiń basshylaryna rizashylyǵyn jetkizdi.
– Jiynǵa qatysyp otyrǵan Ortalyq Aziia memleketteriniń ózara senimi men ortaq kúsh-jigeriniń nátijesinde tatý kórshilik qarym-qatynasqa, dostyq pen qoldaýǵa arqa súiegen yntymaqtastyqtyń buryn-sońdy bolmaǵan úlgisi qalyptasty. Osy rette asa kórnekti memleket qairatkeri, Tóraǵa Si Tszinpin basqaratyn Qytai eliniń belsendi ári tiimdi rólin atap ótkenimiz durys. Kórshiles Qytai Qazaqstannyń máńgi ári strategiialyq seriktesine, naǵyz dosyna ainaldy. Seksen milliondai halqy bar aýqymdy naryqqa ie jáne tabiǵi resýrstarǵa bai bizdiń óńir halyqaralyq qatynastardyń, sondai-aq saýda-ekonomikalyq, investitsiialyq jáne gýmanitarlyq yntymaqtastyqtyń mańyzdy sýbektisi retinde óz pozitsiiasyn birte-birte nyǵaityp keledi. Osynaý oń úderiste Qytai Halyq Respýblikasymen san qyrly yqpaldastyq negizgi ról atqarady. Ortalyq Aziia men Qytai arasyndaǵy bailanystar máńgilik, kez kelgen jaǵdaiǵa beiim ári jan-jaqty strategiialyq seriktestik deńgeiine kóterilgenine basa nazar aýdarǵym keledi, – dedi Prezident.Qasym-Jomart Toqaevtyń aitýynsha, qolda bar múmkindikti biriktirý Qytaimen qarqyndy ári ózara tiimdi yntymaqtastyqqa tyń serpin beredi.
– Ortalyq Aziia memleketteriniń ishki jalpy óniminiń kólemi jarty trillion dollar mejesine taiap qaldy. Sońǵy bes jylda óńirdegi saýda ainalymy aitarlyqtai ulǵaiyp, 10 milliard dollardan asty. Ótken jyly bizdiń aimaqtyń Qytaimen aradaǵy syrtqy saýdasy 40 paiyzǵa jýyqtap, 95 milliard dollardy qurady. Bul – rekordtyq meje. Atalǵan kórsetkishtiń 46 paiyzy Qazaqstanǵa tiesili. Elimizdiń Qytaimen taýar ainalymy 44 milliard dollarǵa jetti. Qytai investitsiiasy Qazaqstannyń ekonomikalyq ósimine mańyzdy úles qosyp keledi. Búginge deiin kórshiles el bizge 26 milliard dollardan astam qarjy quidy. Qazaqstanda Qytai kapitalynyń úlesi bar 5 myńǵa jýyq kásiporyn jumys isteidi, – dedi Prezident.
