پرەزيدەنت ەكىنشى «ورتالىق ازيا – جۇڭگو» سامميتىنە قاتىستى، - دەپ حابارلايدى Dalanews.kz.
مەملەكەت باسشىسى ورتالىق ازيا ەلدەرىمەن جان-جاقتى ىنتىماقتاستىققا نيەت تانىتقانى ءۇشىن قحر ءتوراعاسى سي سزينپينگە العىس ايتتى. سونداي-اق سامميت جۇمىسىنا بەلسەنە اتسالىسىپ، وڭىرلىك ىنتىماقتاستىققا ۇدايى قولداۋ كورسەتىپ كەلە جاتقان باۋىرلاس مەملەكەتتەردىڭ باسشىلارىنا ريزاشىلىعىن جەتكىزدى.
– جيىنعا قاتىسىپ وتىرعان ورتالىق ازيا مەملەكەتتەرىنىڭ ءوزارا سەنىمى مەن ورتاق كۇش-جىگەرىنىڭ ناتيجەسىندە تاتۋ كورشىلىك قارىم-قاتىناسقا، دوستىق پەن قولداۋعا ارقا سۇيەگەن ىنتىماقتاستىقتىڭ بۇرىن-سوڭدى بولماعان ۇلگىسى قالىپتاستى. وسى رەتتە اسا كورنەكتى مەملەكەت قايراتكەرى، ءتوراعا سي سزينپين باسقاراتىن جۇڭگو ەلىنىڭ بەلسەندى ءارى ءتيىمدى ءرولىن اتاپ وتكەنىمىز دۇرىس. كورشىلەس جۇڭگو قازاقستاننىڭ ماڭگى ءارى ستراتەگيالىق سەرىكتەسىنە، ناعىز دوسىنا اينالدى. سەكسەن ميلليونداي حالقى بار اۋقىمدى نارىققا يە جانە تابيعي رەسۋرستارعا باي ءبىزدىڭ ءوڭىر حالىقارالىق قاتىناستاردىڭ، سونداي-اق ساۋدا-ەكونوميكالىق، ينۆەستيسيالىق جانە گۋمانيتارلىق ىنتىماقتاستىقتىڭ ماڭىزدى سۋبەكتىسى رەتىندە ءوز پوزيسياسىن بىرتە-بىرتە نىعايتىپ كەلەدى. وسىناۋ وڭ ۇدەرىستە جۇڭگو حالىق رەسپۋبليكاسىمەن سان قىرلى ىقپالداستىق نەگىزگى ءرول اتقارادى. ورتالىق ازيا مەن جۇڭگو اراسىنداعى بايلانىستار ماڭگىلىك، كەز كەلگەن جاعدايعا بەيىم ءارى جان-جاقتى ستراتەگيالىق سەرىكتەستىك دەڭگەيىنە كوتەرىلگەنىنە باسا نازار اۋدارعىم كەلەدى، – دەدى پرەزيدەنت.قاسىم-جومارت توقايەۆتىڭ ايتۋىنشا، قولدا بار مۇمكىندىكتى بىرىكتىرۋ قىتايمەن قارقىندى ءارى ءوزارا ءتيىمدى ىنتىماقتاستىققا تىڭ سەرپىن بەرەدى.
– ورتالىق ازيا مەملەكەتتەرىنىڭ ىشكى جالپى ءونىمىنىڭ كولەمى جارتى تريلليون دوللار مەجەسىنە تاياپ قالدى. سوڭعى بەس جىلدا وڭىردەگى ساۋدا اينالىمى ايتارلىقتاي ۇلعايىپ، 10 ميلليارد دوللاردان استى. وتكەن جىلى ءبىزدىڭ ايماقتىڭ قىتايمەن اراداعى سىرتقى ساۋداسى 40 پايىزعا جۋىقتاپ، 95 ميلليارد دوللاردى قۇرادى. بۇل – رەكوردتىق مەجە. اتالعان كورسەتكىشتىڭ 46 پايىزى قازاقستانعا تيەسىلى. ەلىمىزدىڭ قىتايمەن تاۋار اينالىمى 44 ميلليارد دوللارعا جەتتى. جۇڭگو ينۆەستيسياسى قازاقستاننىڭ ەكونوميكالىق وسىمىنە ماڭىزدى ۇلەس قوسىپ كەلەدى. بۇگىنگە دەيىن كورشىلەس ەل بىزگە 26 ميلليارد دوللاردان استام قارجى قۇيدى. قازاقستاندا جۇڭگو كاپيتالىنىڭ ۇلەسى بار 5 مىڭعا جۋىق كاسىپورىن جۇمىس ىستەيدى، – دەدى پرەزيدەنت.
