Jyl saiynǵy dástúrge ainalǵan saiystyń erejeleri bul joly kúrdelene tústi. Jańa bólim: Ertis-Baian ólkesi jaily óz áserlerimizben bólisetin beinesiýjet daiyndaý qajet.
Saiystyń alǵashqy kúnin qatysýshylardyń daiyn siýjet tanystyrýlary men jýrnalist sheberligin kórsetetin esse jazýdan bastadyq. Azdaǵan úzilisten soń kelgen qala qonaqtaryn Pavlodar qalasyna ekskýrsiiaǵa alyp shyqty. Ekskýrsiia barysynda Kýtýzov pen Lermontov kósheleriniń qiylysynda ornalasqan Memlekettik Rámizder parkine bardyq. Onda egemendiktiń simvoly tý, eltańba jáne ánuran bar. Park Qazaqstan táýelsizdiginiń 20 jyldyǵyna arnap salynǵan. Keiin Sultanmahmut Toraiǵyrov eskertkishine bardyq. Músin avtory Eshan Sergebaev aqyndy asa sheberlikpen qiialshyl jas keipinde kórkem beinelegen. Máshhúr Júsip Kópeev atyndaǵy meshitke de aiaq bastyq. Meshit qala ortalyǵynda ornalasqan. Arhitektýrasy kesenege uqsas ǵimarattyń 4 munarasy bar. Aspanmen talasqan munaralardyń biiktigi Paiǵambar jasyna orai 63 metr eken. 3 qabatty ǵimaratta ashana, murajai, kitaphana, islam dinin nasihattaityn beinezal, neke qiiý bólmesi bar. Meshitke kirgen kezde birden kózge túsetin úlken zaldaǵy gaýhar tasty shamnyń salmaǵy 3.5 tonna, biiktigi 16,5, eni 6 m. Deshti Qypshaq sáýlet stilnde 8 qabyrǵaly qylyp salynǵan meshittiń ishi qazaqy oiýlarmen kómkerilgen. Úlken ǵibadat úiinde bir mezette 1500 adamnyń namazǵa jyǵylýǵa múmkindikteri bar. Sońǵy núktemiz Buqar jyraý atyndaǵy ádebiet jáne óner murajaiyna boldy. 1992 jyly Ulystyń uly kúninde ashylǵan mýzeige Buqar jyraýdyń 325 jyldyǵyna orai esimi berilgen. Erekshe dizainmen salynǵan qyzyl ǵimarat qala ortalyǵynda ornalasqan. Murajai halyq aýyz ádebieti, kóne túrik jazba ádebieti, Buqar jyraý Qalqamanulynyń shyǵarmashylyǵy, HH ǵasyr basyndaǵy ádebiet, ádebietter dostastyǵy jáne qazirgi zaman ádebieti zaly siiaqty 6 zaldan turady. Sonymen qatar, qoldanysqa jastar jylyna bailanysty óner zaly berilmekshi. Sondai-aq, murajai ortasynda Qanysh Sátpaevtyń 125 jyldyǵyna orai eńbekter jinaǵy toptastyrylǵan. Mýzeide 46 myńnan astam jádigerler bar. Olardyń ishinde basym kópshiligi ólke jazýshylary men aqyndarynyń muralary. Tarih syryna toly murajai óziniń úilesimdiligimen, tárbiege bai maǵlumattarymen esimizde qaldy.Ýniversitet akt zalynda ótken «Qyz Jibek» klýbynyń «Jataqhana ómirnamasy» atty qoiylymyn tamashalap tarqastyq.
Olimpiadanyń ekinshi kezeńi testileýden bastalyp, qazirgi ýaqytta «Jedel aqparat» bólimimen jalǵasyn tabýda. Jalpy, 15-16 sáýir aralyǵynda ótip jatqan olimpiadaǵa biz Atyraý qalasynyń namysyn qorǵaýǵa keldik.
Atyraýlyq Batyspear komandasy
