Oral qalasynda jol jóndeý jumystary daýǵa ulasty. Jergilikti turǵyndardyń aıtýynsha, qala ákimdigi jazǵy maýsymdy tıimdi paıdalana almaı, jóndeý jumystaryn kúzdiń sońyna qaraı bir-aq bastaǵan. Sonyń saldarynan keıbir ýchaskelerde merdiger uıymdar asfáltty laı men sýlanǵan topyraqtyń ústine tósegeni jóninde shaǵymdar kóbeıdi dep habarlaıdy Dalanews.kz.
Halyqtyń aıtýy boıynsha, jol qurylysynyń mundaı ádisi sapanyń tómendeýine ákelip qana qoımaı, búdjet qarajatynyń tıimsiz jumsalýyna sebep bolýy múmkin. Bul jaǵdaı Prezıdenttiń memlekettik qarajatty únemdi ári tıimdi paıdalaný jónindegi tapsyrmasyna qaıshy keletinin aıtýshylar da bar.
Qazaqstan zańdarynda jol sapasyna jaýaptylarǵa qatysty qylmystyq jaýapkershilik qarastyrylǵanymen, onyń is júzinde oryndalýy sırek kezdestetini aıtylýda.
