Atyraý qalasynda U-17 grek-rim jáne erkin kúresten halyqaralyq «OIL CAPITAL CUP» týrniri ótip jatyr. 22–25 qarasha kúnderi ótetin bairaqty básekede alty memleketten jáne elimizdiń barlyq óńirinen jinalǵan tórt júzden astam sportshy ózara myqtylardy anyqtap, chempiondyqty sarapqa salýda, dep habarlaidy Dalanews.kz
Atalmysh jarys Qazaqstan kúres federatsiiasy, Atyraý oblysynyń kúres federatsiiasy jáne Atyraý oblystyq dene shynyqtyrý, Sport jáne týrizm basqarmasy, sondai-aq “TOGAY GROUP”, “NUR ATYRAU QURYLYS” jaýapkershiligi shekteýli seriktestikteri ujymdarynyń birlesken qoldaýymen uiymdastyrylyp otyr.
Elordadan kelgen Amanáli Diiar grek-rim kúresinen 55 kg-ǵa deiingi salmaq dárejesinde chempion atandy.
"Týrnirge qatysýshy retinde kelgenime qatty qýanamyn. Búgin baq pen bap qatar shaýyp, jeńimpaz boldym. Osyǵan deiin aqtyq synda Aqtóbelik qarsylasymmen eki márte kúsh synasqan bolatynbyz, eki beldesýde de ese jiberip qoidym. Sońǵy úsh aida daiyndyqty jiilettim. Jarysqa kelmes buryn Astana qalasynda oqý-jattyǵý jiyndarynan óttim. Jattyqtyrýshylar quramymen turaqty túrde qarsylastarymdy zerttep, beldesýdegi osal tustarymmen tyńǵylyqty jumys jasadym. Osyndai jasalǵan eńbek pen adaptatsiianyń arqasynda jeńiske jetip, eki ret jibergen esemdi qaitardym dep oilaimyn", - dedi Amanáli Diiar.
Týrnirdiń marapattaý rásimine QR Májilis depýtaty, eki dúrkin Olimpiada oiyndarynyń júldegeri, Qazaqstannyń Eńbek sińirgen qairatkeri Dáýlet Turlyhanov jáne Olimpiada chempiony, Qazaqstannyń Eńbek sińirgen qairatkeri "Barys" jáne "Parasat" ordenderiniń iegeri, Qazaqstan resbýplikasynyń Eńbek sińirgen jattyqtyrýshysy, Qazaqstan Respýblikasynyń Eńbek sińirgen sport sheberi Iýrii Melnichenko qatysty.
Saltanatty rásim barysynda Dáýlet Turlyhanov jarys qatysýshylaryna jyly lebizin joldady.
"Armysyzdar, qurmetti Atyraý halqy men sport súier qaýym! Sizderdi kórgenime qýanyshtymyn. Atyraý qalasynda «Munaily astana kýbogi» týrniri ótýde. Jarystyń masshtaby shynymen de úlken deńgeide oryndalypty. Sizderdiń óńirlerińizde osyndai sapaly jáne halyqaralyq deńgeidegi jarys ótkizilýi sport salasynyń alǵa ilgerileýine úlken septigin qosýda. Búginde elimizde týrnirler óte kóp, al solardyń ishinde kóńil toltyrar deńgeidegi dodanyń biri – osy. Endeshe, jarysymyzdyń finaldyq kezeńderin ashyq dep jariialaimyn! Qatysýshylar men uiymdastyrýshylarǵa sáttilik tileimin!, - dedi Dáýlet Turlyhanov.
Jastardy jigerlendirý maqsatynda týrnirdiń arnaiy qonaqtary retinde Demeý Jadyraev, Rizabek Aitmuhan, Aidos Sultanǵali, Nurqoja Qaipanov, Bolat Saqaev jáne Dáýlet Niiazbekov syndy elimizdiń betke ustar chempiondary shaqyryldy.
