Energetika ministrligi jańa jyldan bastap benzin qymbattaýy múmkin ekenin joqqa shyǵarmady, dep habarlaidy Dalanews.kz.
Energetika ministri Erlan Aqkenjenovtiń sózinshe, benzinniń AI-95 jáne AI-98 markalary qymbattaýy múmkin, biraq AI-92, dizel otyny jáne suiytylǵan gaz baǵasy ózgermeidi.
"Áleýmettik mańyzy bar otyn túrlerin atap óteiin – bul 92-benzin men dizel. Olardyń baǵasy buryn da memleketpen rettelip otyrǵan. Al 95 pen 98-benzin rettelmegen, sondyqtan olardyń qymbattaýy múmkin", – dedi Aqkenjenov.
Ministrdiń aitýynsha, AI-92 men dizel otyny boiynsha baǵany ósirýge 2026 jyldyń naýryzyna deiin moratorii jariialanǵan.
"Osy merzimge deiin úkimet baǵany kótermeý týraly sheshim qabyldady. Buǵan suiytylǵan munai gazy da kiredi", – dep atap ótti ol.
Sonymen qatar, ministr zań boiynsha jylyna eki ret baǵa ózgertýge ruqsat berilse de, moratorii kezinde bul norma qoldanylmaitynyn eske saldy.
"Zańda baǵany jylyna eki ret túzetýge múmkindik bar, biraq moratorii engizilgendikten, 2026 jyldyń naýryzyna deiin baǵa ózgermeidi", – dedi Aqkenjenov.
Eske salaiyq, buǵan deiin ekonomist ári R-Finance sarapshysy Arman Baiǵanov Dalanews.kz-ke bergen suhbatynda Qazaqstanda janarmai tapshylyǵy qaýpi baryn aitqan edi.
