Qostanai oblysynyń Rýdnyi qalasynda eki kósheniń ataýyn ózgertý máselesi qoǵamda úlken talqy týǵyzdy. Bul jaǵdai saiasattanýshy Daniiar Áshimbaevtyń aitýynsha, eldegi «ótkendi qaralaý» dástúriniń taǵy bir kórinisine ainalǵan, dep habarlaidy Dalanews.kz.
«Másele kóshe ataýynda emes, tarihqa degen kózqarasta»
Saiasattanýshynyń pikirinshe, másele kóshelerdiń burynǵy ataýynda da, onomastika komissiiasy usynyp otyrǵan jańa nusqalarda da emes.
«Bul - bizdiń tarihqa degen qarym-qatynasymyzǵa bailanysty másele. Elde ótkenge qarsy soǵysýǵa degen túsiniksiz áýestik áli de bar», - dep jazdy ol telegram arnasynda.
Áshimbaevtyń aitýynsha, Qazaqstanda basshy ózgerse – burynǵysyn mindetti túrde synaý, jańa kezeń bastalsa – ótkendi tolyǵymen jamandaý degen. dástúrge ainalǵan bir ádet bar.
Onyń sózinshe, mundai impýls kóbine biliktiń legitimdigin kúsheitý úshin «joǵarydan» beriledi. Biraq synnyń tym shekten shyǵýy qoǵamǵa keri áser etedi.
«Kóbi kezinde maqtap júrip, keiin aiaq astynan qarsy shyǵady»
Saiasattanýshy mundai naýqanshyl synnyń eki úlken máselesin atap ótti:
Birinshiden, burynǵy basshylyqtyń kezinde esh qarsylyq bildirmegen, kerisinshe maqtap kelgen adamdar keiin túbegeili qarsy pozitsiiaǵa ótip ketedi. Bul, onyń pikirinshe, qoǵamda senimsizdik týdyrady.
Ekinshiden, Keńes dáýirin de, Táýelsizdiktiń alǵashqy kezeńderin de tek teris jaqtan ǵana baǵalaý - tarihi ádiletsizdik.
«Keńestik kezeńde Qazaqstan bilim, mádeniet, densaýlyq saqtaý salasynda úlken jetistikke jetip, agrarly-indýstriialyq respýblikaǵa ainaldy. Búgingi infraqurylymnyń basym bóligi sol kezeńnen qalǵan. Nazarbaev biligi kezinde Qazaqstan táýelsizdik alyp, halyqaralyq arenada moiyndaldy, naryqtyq ekonomikaǵa ótti, áleýmettik jáne saiasi turaqtylyq qalyptasty», - deidi Áshimbaev.
«Ótkendi tek jamandai berý - qoǵamdy kúizeliske ákeledi»
Sarapshynyń aitýynsha, el halqynyń edáýir bóligi ómiriniń negizgi bóligin dál osy kezeńderde ótkizgen. Sondyqtan olardyń jeke tájiribesi resmi aqparattan bólek bolýy zańdy.
«Tarihty tek qaralaý - qoǵamda óz ómirine degen jaǵymsyz kózqaras qalyptastyrady. Bul qazirgi saiasatqa degen senimsizdikti arttyrady», - deidi Áshimbaev.
Onyń aitýynsha, ótkenge qatysty únemi negativ taratý nostalgiiany kúsheitedi jáne bilikke unamaityn «salystyrý effektisin» týǵyzady.
«Tarihty túsinbei - damýdy kútý qiyn»
Áshimbaevtyń pikirinshe, ótkendi zerttemei, oi eleginen ótkizbei jatyp tek aiyptai berý - ulttyq mentalitetke de, memlekettik basqarýǵa da ziian.
«Jinalǵan tájiribeni taldai almaý - sheshim qabyldaý sapasyna áser etedi. Qazirgi kezeń aiaqtalǵan soń dál osy syn aitýshylardyń ózi bolashaqta búgingi ýaqytty jamandaýǵa kóshedi. Óitkeni bizde dástúr osyndai», - deidi ol.
Eske salaiyq, Rýdnyidaǵy kóshelerdi qazaqylandyrý máselesi qyzý talqyǵa túsken bolatyn.
