Qazaqstanda AI-92 markaly benzinniń baǵasy bolashaqta litrine shamamen 1 AQSh dollaryna jetýi múmkin. Mundai pikirdi munai-gaz salasynyń sarapshysy Oljas Baidildinov aitty, dep habarlaidy dalanews.kz.
Onyń baǵalaýynsha, eldegi jumys istep turǵan úsh munai óńdeý zaýytyn jańǵyrtý jáne tórtinshi MÓZ salý úshin 14–16 mlrd dollar kóleminde investitsiia qajet. Sarapshynyń aitýynsha, mundai iri jobalardyń ózin-ózi aqtaýy úshin benzin baǵasy qazirgi deńgeiden joǵary bolýy kerek.
«AI-92 benzininiń baǵasy shamamen litrine 1 dollar bolýy qajet», – dedi Oljas Baidildinov.
Buǵan deiin premer-ministr Oljas Bektenov Qazaqstanda benzin baǵasyn yryqtandyrý qajet ekenin málimdegen bolatyn. Onyń sózinshe, qazirgi tańda eldegi janarmai baǵasy kórshiles memlekettermen salystyrǵanda shamamen eki ese arzan. Sondyqtan munai óńdeý salasyna investitsiia salý ekonomikalyq turǵydan tiimsiz bolyp otyr.
Oljas Baidildinov bul pikirmen kelisetinin aitty. Onyń sózinshe, jańa munai óńdeý qýattaryn tolyq júkteý úshin Qazaqstanǵa Teńiz jáne Qashaǵan ken oryndarynyń operatorlarynan qosymsha munai satyp alýǵa týra keledi. Alaida bul kompaniialar munaidy qazirgi ishki naryqtaǵy baǵamen satýǵa múddeli emes.
«Taǵy da atap ótemin: qazirgi baǵalar saqtalsa, eshbir zaýyt pen eshbir jańǵyrtý jobasy eshqashan ózin aqtamaidy jáne biz burynǵydai Reseiden munai ónimderin importtaýdy jalǵastyramyz. Sondyqtan janarmai baǵasyn teńestirý – elimizdiń energetikalyq jáne ekonomikalyq qaýipsizdigine qatysty másele. Biraq salalyq ministrlik barlyq kólik ielerin aldyn ala eskertýi kerek dep sanaimyn: bolashaqta benzinniń baǵasy shamamen 1 dollar bolady», – dedi sarapshy.
