قوستاناي وبلىسىنىڭ رۋدنىي قالاسىندا ەكى كوشەنىڭ اتاۋىن وزگەرتۋ ماسەلەسى قوعامدا ۇلكەن تالقى تۋعىزدى. بۇل جاعداي ساياساتتانۋشى دانيار اشىمبايەۆتىڭ ايتۋىنشا، ەلدەگى «وتكەندى قارالاۋ» ءداستۇرىنىڭ تاعى ءبىر كورىنىسىنە اينالعان، دەپ حابارلايدى Dalanews.kz.
«ماسەلە كوشە اتاۋىندا ەمەس، تاريحقا دەگەن كوزقاراستا»
ساياساتتانۋشىنىڭ پىكىرىنشە، ماسەلە كوشەلەردىڭ بۇرىنعى اتاۋىندا دا، ونوماستيكا كوميسسياسى ۇسىنىپ وتىرعان جاڭا نۇسقالاردا دا ەمەس.
«بۇل - ءبىزدىڭ تاريحقا دەگەن قارىم-قاتىناسىمىزعا بايلانىستى ماسەلە. ەلدە وتكەنگە قارسى سوعىسۋعا دەگەن تۇسىنىكسىز اۋەستىك ءالى دە بار»، - دەپ جازدى ول تەلەگرام ارناسىندا.
اشىمبايەۆتىڭ ايتۋىنشا، قازاقستاندا باسشى وزگەرسە – بۇرىنعىسىن مىندەتتى تۇردە سىناۋ، جاڭا كەزەڭ باستالسا – وتكەندى تولىعىمەن جامانداۋ دەگەن. داستۇرگە اينالعان ءبىر ادەت بار.
ونىڭ سوزىنشە، مۇنداي يمپۋلس كوبىنە بيلىكتىڭ لەگيتيمدىگىن كۇشەيتۋ ءۇشىن «جوعارىدان» بەرىلەدى. ءبىراق سىننىڭ تىم شەكتەن شىعۋى قوعامعا كەرى اسەر ەتەدى.
«كوبى كەزىندە ماقتاپ ءجۇرىپ، كەيىن اياق استىنان قارسى شىعادى»
ساياساتتانۋشى مۇنداي ناۋقانشىل سىننىڭ ەكى ۇلكەن ماسەلەسىن اتاپ ءوتتى:
بىرىنشىدەن، بۇرىنعى باسشىلىقتىڭ كەزىندە ەش قارسىلىق بىلدىرمەگەن، كەرىسىنشە ماقتاپ كەلگەن ادامدار كەيىن تۇبەگەيلى قارسى پوزيسياعا ءوتىپ كەتەدى. بۇل، ونىڭ پىكىرىنشە، قوعامدا سەنىمسىزدىك تۋدىرادى.
ەكىنشىدەن، كەڭەس ءداۋىرىن دە، تاۋەلسىزدىكتىڭ العاشقى كەزەڭدەرىن دە تەك تەرىس جاقتان عانا باعالاۋ - تاريحي ادىلەتسىزدىك.
«كەڭەستىك كەزەڭدە قازاقستان ءبىلىم، مادەنيەت، دەنساۋلىق ساقتاۋ سالاسىندا ۇلكەن جەتىستىككە جەتىپ، اگرارلى-يندۋستريالىق رەسپۋبليكاعا اينالدى. بۇگىنگى ينفراقۇرىلىمنىڭ باسىم بولىگى سول كەزەڭنەن قالعان. نازاربايەۆ بيلىگى كەزىندە قازاقستان تاۋەلسىزدىك الىپ، حالىقارالىق ارەنادا مويىندالدى، نارىقتىق ەكونوميكاعا ءوتتى، الەۋمەتتىك جانە ساياسي تۇراقتىلىق قالىپتاستى»، - دەيدى اشىمبايەۆ.
«وتكەندى تەك جامانداي بەرۋ - قوعامدى كۇيزەلىسكە اكەلەدى»
ساراپشىنىڭ ايتۋىنشا، ەل حالقىنىڭ ەداۋىر بولىگى ءومىرىنىڭ نەگىزگى بولىگىن ءدال وسى كەزەڭدەردە وتكىزگەن. سوندىقتان ولاردىڭ جەكە تاجىريبەسى رەسمي اقپاراتتان بولەك بولۋى زاڭدى.
«تاريحتى تەك قارالاۋ - قوعامدا ءوز ومىرىنە دەگەن جاعىمسىز كوزقاراس قالىپتاستىرادى. بۇل قازىرگى ساياساتقا دەگەن سەنىمسىزدىكتى ارتتىرادى»، - دەيدى اشىمبايەۆ.
ونىڭ ايتۋىنشا، وتكەنگە قاتىستى ۇنەمى نەگاتيۆ تاراتۋ نوستالگيانى كۇشەيتەدى جانە بيلىككە ۇنامايتىن «سالىستىرۋ ەففەكتىسىن» تۋعىزادى.
«تاريحتى تۇسىنبەي - دامۋدى كۇتۋ قيىن»
اشىمبايەۆتىڭ پىكىرىنشە، وتكەندى زەرتتەمەي، وي ەلەگىنەن وتكىزبەي جاتىپ تەك ايىپتاي بەرۋ - ۇلتتىق مەنتاليتەتكە دە، مەملەكەتتىك باسقارۋعا دا زيان.
«جينالعان تاجىريبەنى تالداي الماۋ - شەشىم قابىلداۋ ساپاسىنا اسەر ەتەدى. قازىرگى كەزەڭ اياقتالعان سوڭ ءدال وسى سىن ايتۋشىلاردىڭ ءوزى بولاشاقتا بۇگىنگى ۋاقىتتى جامانداۋعا كوشەدى. ويتكەنى بىزدە ءداستۇر وسىنداي»، - دەيدى ول.
ەسكە سالايىق، رۋدنىيداعى كوشەلەردى قازاقىلاندىرۋ ماسەلەسى قىزۋ تالقىعا تۇسكەن بولاتىن.
