Qazaqstanda aldaǵy merekeler kezinde áýe jáne temirjol biletteriniń quny ózgermeidi. Bul týraly Kólik vitse-ministri Maqsat Qaliaqparov Úkimet kýlýarynda aitty, dep habarlaidy Dalanews.kz.
Qaliaqparovtyń sózinshe, jańa jyldyq suranystyń artýyna qaramastan, tasymaldaýshylar tarifti kóterýdi josparlap otyrǵan joq.
"Bilet baǵasyn qymbattatý qarastyrylmaǵan. Kópshilik saparyn erterek josparlap, biletterin aldyn ala satyp alady. Sondyqtan olar úshin qoljetimdi baǵa saqtalady", – dedi ol.
Vitse-ministr merekelik kezeńdegi jolaýshylar aǵymyn eskerip, qosymsha reisterdiń daiyndalǵanyn jetkizdi.
Onyń aitýynsha, aviakompaniialar qosymsha áýe kemelerin bólgen. Reis sany kóbeiedi. Sondai-aq Almaty, Shymkent, Taraz baǵyttaryna suranys joǵary.
Temirjol salasynda da dál osyndai sharalar qabyldanýda.
"Poiyzdar sany artady. Buǵan qosa, bar marshrýttarǵa qosymsha vagondar tirkep, jolaýshy oryndary keńeitiledi", – dedi vedomstvo ókili.
