Ońtústik Koreiada óz biznesin ashqan qazaq qyzy
Koreia, Japoniia, AQSh jáne Qytaida satylym jaǵynan rekordtyq kórsetkishke ie betke arnalǵan krem bar. Onyń qudireti – bettegi ájimdi qysqa merzim ishinde joiatyn kórinedi. Sonysymen de ótimdi. Al osy kremdi shyǵaratyn Ońtústik Koreianyń Inchhon qalasyndaǵy fabrikanyń qojaiyny kim ekenin bilesiz be?
Ol – bizdiń jerlesimiz, qazaq qyzy – Galina Álimova. Qazirgi qiyn kúnderde pandemiiaǵa bailanysty bul óndiris oshaǵy santaizerlerdi jasap shyǵarýmen de ainalysa bastaǵan.
Batys Qazaqstan óńiriniń týmasy otandasymyz joǵary oqý ornyn aiaqtaǵan soń, bastapqyda korei kompaniiasyna jumysqa turypty. Sol kezde onyń bolashaq kásipkerlik isiniń irgetasy túzilip, kirpishi qalana bastaidy.
Iaǵni, sol sheteldik kompaniiada júrip, qarapaiym jumysshydan iri kompaniia direktorynyń orynbasaryna deiin óz kúshimen kóteriledi. Keiinnen ózi bólek otaý tigip, biznesti jeke júrgize bastaidy.
Qazir ol tek Koreia emes, birqatar shetelge tanylǵan, biznes salasynyń jiligin shaǵyp, maiyn ishken kásibi bike. 20 jyldan astam elinen jyraqta osylaisha óz eńbegimen kóterilip, tabystylyǵy boiynsha kópke úlgi Galinamen suhbattasýdyń sáti túsken edi.
- Otanyńyzdy saǵynasyz ba? Elge oralý oiyńyzda joq pa?
- Qalai saǵynbaisyz, saǵynamyz. Qazirgi óndiristegi taýarlarymyzǵa suranys bolyp jatsa, elimizge de ákelsem be deimin. Kórip otyrǵandaryńyzdai, arasynda qazaqsha ataý da bar.
Pandemiia dep alaqan jaiyp qarap otyrǵan joqpyz. Jyl basynda kosmetikaǵa arnalǵan fabrikamyz taǵy bir baǵytty ashty, iaǵni qoldaǵy mikroptardy joiýǵa arnalǵan eritindi – sanitaizerlerdi shyǵara bastadyq. Bastapqyda kúnine dezinfektsiiaǵa arnalǵan 8 myń dana zat óndiriletin, qazir de osy kólemdi saqtap qalýdamyz. Qazir kosmetika ónimderine suranys azaiǵanmen, bul zattarǵa suranys joǵary.
Árine, Qazaqstanda kosmetikalyq zaýyt ashsam ba deimin. Mysaly kóktemde, Alataý bókterinde báisheshek qaptap shyǵyp, kózdiń jaýyn alady. Bul gúldiń adam terisine paidasy kóp. Ony kosmetikada shikizat retinde paidalanýǵa bolady.
Odan keiin bizde ara baly da óndiriledi. Ol jalpy adam densaýlyǵyna paidasy kóp. Odan sýsabynnan bastap betke arnalǵan maskaǵa deiin jasaýǵa bolady. Koreiada dóńgeletip jatqan óndiristi Qazaqstanda nege dóńgeletpeske?
Menińshe, oǵan Otanymyzda barlyq múmkindik bar. Ózim tehnikalyq ýniversitetti támamdadym. Sondyqtan maǵan óndiris salasyndaǵy kez kelgen nárse qyzyq.
Osynda kelgeli bas almai atqaratyn nársemniń biri – óndiris oshaqtarynda bolý, basshylarymen, professorlarmen júzdesip, sóilesý. Óitkeni bizde qanshama himiia elemenetteri bar, biraq Koreiadaǵydai óndiris oshaqtarynyń tizbegine ainalyp ketpegen, sonyń sebebin izdedim. Sol sebepti aýyr himiia ónerkásibinen bastap zerthanalarǵa deiin aralap kórdim. Men úshin bul úlken tájiribe boldy.
- Qazaqsha ataý dep qaldyńyz, osy arasyna keńirek toqtala ketseńiz...
- Bul – kosmetikalyq ónimderdiń brendi. Máselen, kóptegen el attai qalatyp aldyrtatyn - «Ainalaiyn» essentsiiasy. Ony «24K» dep te ataimyz keide, bul krem quramyndaǵy altyn. Sodan keiin de bul ónimniń baǵasy qymbat. Qaltaly azamattarǵa arnalǵan. Al ataýyn «Ainalaiyn» dep ózim qoidym. Bala kúnimizden qulaqta qalǵan sóz, qazaq balasyn osylai erkeletedi ǵoi. Júrekke jylý, boiǵa erekshe kúsh syilaidy. Sol sebepti osylai ataýdy jón kórdim. «Ana Global» degen ataýdaǵy kosmetikamyz da bar. Qyz balanyń bir mindeti ana bolý emes pe? Al ana degen kóp mindet pen qyzmetti atqarady. Keide balaly áieldiń ózine qaraýǵa ýaqyty bolmai jatady. Sondyqtan osyndai olqylyqqa jol bermei, analarǵa qamqorlyq tanytatyn kosmetikamyzdyń jeke bir liniiasy bar. Tek krem emes, sýsabyn, betke arnalǵan maska syndy kóptegen kosmetikalyq ónimder óndiremiz. 20 myńnan 30 myń danaǵa deiin kosmetika túrlerine tapsyrys qabyldai alamyz.
- Koreia degen Frantsiiadan keiingi kosmetika áleminiń Otany bolyp tabylady emes pe? Munda sapa, baǵa jaǵynan bolsyn básekelestik kúshti. Soǵan tótep bere alyp jatyrsyz ba? Qazaq qyzy syrttan kelip, kosmetika ainalysýmen shuǵyldanyp, bul ortaǵa qalai sińisip, ony tabysty biznes túrine ainaldyrdy?
- Ras aitasyz. Koreia – naǵyz eńbekqorlardyń eli. Ár adam munda óziniń ýaqytyn tiimdi jumsaidy. Munda ýaqyt- aqsha. Sondyqtan bos júris degen atymen joq. Halqy 3-4 saǵat qana uiyqtaidy, sodan keiin jumys, jumys, jumys. Keremet eńbekqor halyq. Bul eldiń ornynan tez kóterilip, tez damýynyń basty qupiiasy osynda sekildi. Men munda kelgende birden kosmetikamen ainalysyp ketken joqpyn...
Ózim Batys Qazaqstan oblysy, Aqjaiyq aýdany, Mergen aýylynda dúniege kelip, orta mektepti támamdadym. Sodan Almatydaǵy Qanysh Sátpaev atyndaǵy Qazaq Ulttyq tehnikalyq ýniversitetiniń «programmist» mamandyǵy boiynsha oqýǵa tústim. JOO-ny aiaqtaǵan soń sol qaladaǵy korei kompaniialarynyń birine jumysqa ornalastym.
Eńbekqorlyǵymmen kompaniia basshysy kózine túsip, ol maǵan til úirenip alǵanym jón bolatynyn aitty. Sóitip kóp uzamai Seýlge baryp, shet tilderi institýtynda bilim aldym. Sonymen qatar jumys ta istei berdim. Bul 1999 jyl bolatyn. Basynda Reseige traktor, ekskovator jónelttik, sol sekildi Vladivostokqa da túrli kólikterdi satýǵa jiberdik. Orys tilin jetik biletindigim jaqsy ról atqardy bul rette.
Osylaisha Koreiadaǵy kishi jáne orta biznesti basqaratyn korporatsiianyń TMD elderi boiynsha bas direktoryna deiin kóterildim. Endi aýyr tehnikalar ǵana emes, suranysta qandai taýar túrleri bar, solardyń barlyǵyn TMD-ǵa tasymaldaýmen shuǵyldandyq. Arasynda kosmetikany da jetkizemiz.
Birneshe kompaniia taýarlaryn TMD elderine naryqtaryna jetkizýmen ainalystyq. Bir kúni osy biznes túrleri ishinde kosmetika maǵan qatty jaqyn ekenin ańǵardym. Sodan bastap ózimniń kosmetika biznesimdi ashsam degen mende arman paida boldy. Investitsiiaǵa bastapqy kapital bolsa, bolǵany. Mende aqsha boldy. Sodan keiin bul iske jeń túre kiristim. Meniń janymda ustazym – I San Ho degen myrza boldy, barlyǵyn sol kisi kórsetip otyrdy, qazir de ol kisimen menimen birge jumys isteidi. Bul salany jetik biletin qasynda adam bolǵannan keiin de bul biznes túrin ashý maǵan qiynǵa soqpady.
Men shyǵaratyn kosmetikalyq ónimderdi anyqtap, onyń ataýyn jasap, óndiriske daiyndaimyn, al I San Ho myrza dizainmen ainalysady, iaǵni álgi ónimniń qoraby, shyny qutysy, ol qalai ásemdelýi kerek, bul jaǵyn sol kisi sheshedi.
Biz kosmetika shyǵaryp qana qoimai, óz kompaniiasynyń atymen nemese óz brendimen shyǵarǵysy kelgen kásipkerlerge ónim daiyndap bere alamyz. Ony OEM/ODM júiesi dep ataidy. Biz osy júie boiynsha da tapsyrys qabyldaimyz. Ondaida shyǵarýshy retinde bizdiń kompaniia ataýy jazylady.
- Fabrikańyzda qansha jumysshy jumys isteidi?
- Fabrika degennen góri, kompaniia degen durys sekildi. Óitkeni fabrikadan tys jumys isteitin jumysshylarymyz da bar. Máselen, laboranttar, dizainerler, flakon jasaýshylar, qorap jasaityndar, biraq biz olarmen áriptese otyryp jumys isteimiz. Iri tapsyrystar qabyldaǵanda osy baǵyttaǵy kompaniialarmen tizgin qaǵystyra jumys isteimiz.
Sonymen qatar, tek Qytaida da kosmetika qoraptaryn shyǵaratyn shaǵyn zaýytymyz bar. Keide adam jetpei jatsa, qosymsha jumys kúshin jaldaimyz.
- Sonda tek kosmetika óndirisi, sanitaizerler shyǵarýmen ainalysasyzdar ma?
- Qazirgi shuǵyldanyp jatqan baǵytymyz osy. Biraq bolashaqta biznesimdi keńeitý josparda bar. Sońǵy kezderi den qoiyp júrgen salanyń biri - meditsina. Munda Qazaqstan azamattary em izdep, kóp keledi.
Men, kerisinshe mundaǵy mamandardy Qazaqstanǵa alyp barsam ba deimin. Osy maqsatta birneshe professorlarmen sóilesip, bir istiń basyn pysyqtap qoidyq. Máselen, professor, hirýrg Kim Djon Min Oral qalasynda boldy ótkende, zobqa shaldyqqan 4-5 naýqasqa ota jasady, bári tegin boldy. Osy sekildi meditsina salasynyń kásibi bilikti mamandaryn Qazaqstanǵa aparyp, bir jańa iske túren salsam ba deimin.
Odan soń, tilge qatysty da bir josparlarym bar. Naqtyraq aitqanda, qytai, korei tilderin úiretetin onlain baǵdarlamalardy qolǵa alyp jatyrmyn. Qalai degenmen de isteimin degen niet bolsa, shúkir, atqaratyn sharýa kóp.
- Koreiada júrip turmysqa shyqtyńyz ba?
- Iá, kúieýim osy eldiń azamaty, úsh balamyz bar. Biznesimiz otbasylyq bolyp tabylady.
- Suqbatyńyzǵa raqmet!
Áńgimelesken, Kámshat SÁTIEVA
