– Ózderińizge belgili, Túrkistan oblysy respýblıkadaǵy maqta ósiretin jalǵyz óńir. Maqta sharýashylyǵynda 25 myń agroqurylymda 70 myńǵa jýyq adam eńbek etedi.
Oblysta jyl saıyn 120 myń gektar maqta egilip, 300 myń tonnaǵa jýyq shıtti maqta jınalady. Elde toqyma jáne tigin ónerkásibi durys damymaǵandyqtan, shıki maqtany satý baǵasy Lıverpýl maqta bırjasyndaǵy maqta talshyǵynyń ındeksine tikeleı táýeldi.
Sondyqtan biz toqyma, tigin ónerkásibin damytý, maqta klasterin qalyptastyrý maqsatynda arnaıy jospar ázirledik. Ózbekstandyq ınvestorlarmen birlese otyryp, 2023-2025 jyldary Maqtaaral aýdanynda 21 mlrd teńgege maqta-toqyma kesheni jáne logıstıkalyq habty qurý ınvestısıalyq jobasyn júzege asyramyz. Jobanyń qýattylyǵy – 160 myń tonna, 3000 jańa jumys orny qurylady.
Eń aldymen maqta tuqymynyń sapasyn jaqsartý máselesine mán beriledi, – dedi Darhan Satybaldy.
Osy jumystar nátıjesinde oblysta óndiriletin shıtti maqtanyń 70% tereń qaıta óńdeýden ótkizip, baǵa naryqtaǵy táýeldilikten qutylady. Budan bólek, Túrkıa memleketimen elıtalyq maqta tuqymyn elimizge ımportaýǵa kelisimsharttar túzildi. 2027 jylǵa deıin ishki naryq tolyǵymen sapaly elıtalyq tuqymdarmen qamtamasyz etiledi.
Bıyl kórshiles Ózbekstan, Túrkıa elderinen elıtaly tuqymdyq shıt jetkizilgen.
Túrkistan oblysynda maqta-toqyma klasterin qurý jobasy ázirlengen. Os iske asqanda 75 kásiporyn salynbaq. Jobany tolyq iske asyrý kezinde 41,9 myń jańa jumys orny qurylady, jyl saıyn búdjetke túsetin túsimder somasy 26,2 mlrd. teńgeni quraıdy.
Jobany tolyq iske asyrý úshin ınvestısıa qajet. Osyǵan baılanysty maqta-toqyma klasterin qurý boıynsha salalyq baǵdarlama qabyldaý jóninde QR Úkimetine usynys engizilgen.
Oǵan qosa, maqta alqaptaryn qysqartý, egistikti ártaraptandyrý boıynsha da jumystar bastalǵan. Júgeri, mash ónimin egýge usynys berilgen. Búginde dıqandar bul baǵytta da jumys júrgizýde. Sarapshylardyń aıtýynsha, atalǵan daqyldardan túsetin tabys mol ári suranys ta joǵary.