Úsharal áýejaiy men Aqshi aýyly arasyna oblys ákimdigi tarapynan sýbsidiialanatyn arnaiy avtobýs marshrýty júrgizilmek,- dep habarlaidy Dalanews.kz
Eń aldymen atap ótsek, sońǵy jyldary Úsharal qalasy baǵytynda áýe reisteriniń sany artty. Endi Alakólge kún saiyn Astana jáne Almaty qalalarynan «Almaty-Úsharal» jáne «Astana-Úsharal» baǵyttary arqyly jetýge bolady. Memleket tarapynan sýbsidiialanǵan biletter quny - nebári 20 000 teńge. Áýejai qazir saǵatyna 50 jolaýshy ótkizýge qabiletti.
- 2022 jyly áýejaidyń ushyp-qoný jolaǵy qaita jańǵyrtylyp, betki qabaty 52 sm qalyńdyqtaǵy tsement-betonmen nyǵaityldy. Sonyń arqasynda iri áýe kemelerin qabyldaýǵa múmkindik jasaldy. Qazir Astana, Almaty qalalary men Úsharaldyń arasynda sýbsidiialanatyn maýsymdyq áýe qatynasy kúndelikti júredi. Áýejai jumysy jalpy Alakól aýdanynyń týristik áleýetin arttyrýǵa úlken yqpal etip otyr, - deidi «Jetisý» aviakompaniiasy» AQ Úsharal qalasy áýejaiynyń direktory Aidyn Baibazarov.
Sol siiaqty jazǵy shomylý maýsymyna qarai qosymsha poiyzdar iske qosyldy. Kólge 13 poiyz júredi, onyń ishinde Astana men Almatydan shyǵatyn «Talgo» júrdek poiyzy da bar. Oǵan qosa Óskemen, Pavlodar, Qyzylorda, Semei jáne Aqtoǵai baǵyttary qosyldy.
Sondai-aq Aqshi jáne Kóktuma aýyldaryna avtobýs marshrýttary uiymdastyryldy. Almatydaǵy «Sairan» jáne Taldyqorǵandaǵy avtobeketterden avtobýstar turaqty júredi. Bilet quny 5 000 teńge men 9 000 teńgeniń aralyǵynda.
Bir atap óterligi, jýyrda Úsharal áýejaiy men Aqshi aýylynyń arasyna avtobýs qatynaityn bolady.
- Alakól jaǵalaýyndaǵy jekelegen qonaq úiler bolmasa, kópshilik demalys oryndarynda transfer qarastyrylmaǵandyqtan, týrister tarapynan jii aitylatyn máseleniń biri Úsharal áýejaiy men Aqshi aýylynyń arasynda avtobýs qatynasy jaiy bolatyn. Bul másele sheshimin tapty. Oblys ákimdiginiń qoldaýymen sýbsidiialanatyn avtobýs marshrýty shyǵarylady. Qazir konkýrs rásimderi aiaqtaldy. Jaqyn kúnderde avtobýs júre bastaidy, - dedi Alakól aýdanynyń ákimi Almas Ábdinov.
Eske salsaq, sońǵy jyldary «Taldyqorǵan - Úsharal», «Úsharal - Dostyq» avtojoldary qaita jańǵyrtylyp, qoldanysqa berilgen bolatyn.
