ءۇشارال اۋەجايى مەن اقشي اۋىلى اراسىنا وبلىس اكىمدىگى تاراپىنان سۋبسيديالاناتىن ارنايى اۆتوبۋس مارشرۋتى جۇرگىزىلمەك،- دەپ حابارلايدى Dalanews.kz
ەڭ الدىمەن اتاپ وتسەك، سوڭعى جىلدارى ءۇشارال قالاسى باعىتىندا اۋە رەيستەرىنىڭ سانى ارتتى. ەندى الاكولگە كۇن سايىن استانا جانە الماتى قالالارىنان «ءالماتى-ۇشارال» جانە «ءاستانا-ۇشارال» باعىتتارى ارقىلى جەتۋگە بولادى. مەملەكەت تاراپىنان سۋبسيديالانعان بيلەتتەر قۇنى - نەبارى 20 000 تەڭگە. اۋەجاي ءقازىر ساعاتىنا 50 جولاۋشى وتكىزۋگە قابىلەتتى.
- 2022 جىلى اۋەجايدىڭ ۇشىپ-قونۋ جولاعى قايتا جاڭعىرتىلىپ، بەتكى قاباتى 52 سم قالىڭدىقتاعى سەمەنت-بەتونمەن نىعايتىلدى. سونىڭ ارقاسىندا ءىرى اۋە كەمەلەرىن قابىلداۋعا مۇمكىندىك جاسالدى. ءقازىر استانا، الماتى قالالارى مەن ءۇشارالدىڭ اراسىندا سۋبسيديالاناتىن ماۋسىمدىق اۋە قاتىناسى كۇندەلىكتى جۇرەدى. اۋەجاي جۇمىسى جالپى الاكول اۋدانىنىڭ تۋريستىك الەۋەتىن ارتتىرۋعا ۇلكەن ىقپال ەتىپ وتىر، - دەيدى «جەتىسۋ» اۆياكومپانياسى» اق ءۇشارال قالاسى اۋەجايىنىڭ ديرەكتورى ايدىن بايبازاروۆ.
سول سياقتى جازعى شومىلۋ ماۋسىمىنا قاراي قوسىمشا پويىزدار ىسكە قوسىلدى. كولگە 13 پويىز جۇرەدى، ونىڭ ىشىندە استانا مەن الماتىدان شىعاتىن «تالگو» جۇردەك پويىزى دا بار. وعان قوسا وسكەمەن، پاۆلودار، قىزىلوردا، سەمەي جانە اقتوعاي باعىتتارى قوسىلدى.
سونداي-اق اقشي جانە كوكتۇما اۋىلدارىنا اۆتوبۋس مارشرۋتتارى ۇيىمداستىرىلدى. الماتىداعى «سايران» جانە تالدىقورعانداعى اۆتوبەكەتتەردەن اۆتوبۋستار تۇراقتى جۇرەدى. بيلەت قۇنى 5 000 تەڭگە مەن 9 000 تەڭگەنىڭ ارالىعىندا.
ءبىر اتاپ وتەرلىگى، جۋىردا ءۇشارال اۋەجايى مەن اقشي اۋىلىنىڭ اراسىنا اۆتوبۋس قاتىنايتىن بولادى.
- الاكول جاعالاۋىنداعى جەكەلەگەن قوناق ۇيلەر بولماسا، كوپشىلىك دەمالىس ورىندارىندا ترانسفەر قاراستىرىلماعاندىقتان، تۋريستەر تاراپىنان ءجيى ايتىلاتىن ماسەلەنىڭ ءبىرى ءۇشارال اۋەجايى مەن اقشي اۋىلىنىڭ اراسىندا اۆتوبۋس قاتىناسى جايى بولاتىن. بۇل ماسەلە شەشىمىن تاپتى. وبلىس اكىمدىگىنىڭ قولداۋىمەن سۋبسيديالاناتىن اۆتوبۋس مارشرۋتى شىعارىلادى. ءقازىر كونكۋرس راسىمدەرى اياقتالدى. جاقىن كۇندەردە اۆتوبۋس جۇرە باستايدى، - دەدى الاكول اۋدانىنىڭ اكىمى الماس ءابدينوۆ.
ەسكە سالساق، سوڭعى جىلدارى «تالدىقورعان - ءۇشارال»، «ءۇشارال - دوستىق» اۆتوجولدارى قايتا جاڭعىرتىلىپ، قولدانىسقا بەرىلگەن بولاتىن.
