Búgin «Óner ortalyǵynda» «Qazaqstan Ulttyq Ýrban Forýmy 2025 – Qyzylorda» halyqaralyq forýmynyń ashylý rásimi ótti,- dep habarlaidy Dalanews.kz
Halyqaralyq forýmǵa QR Ekologiia jáne tabiǵi resýrstar ministri Erlan Nysanbaev, QR Syrtqy ister ministriniń birinshi orynbasary Aqan Rahmetýllin, QR Ónerkásip jáne qurylys ministrligi ókilderi, QR Parlamenti Senaty men Májilisiniń depýtattary, Qazaqstandaǵy Birikken Ulttar Uiymynyń turaqty úilestirýshisi Sarango Radnaragcha, Birikken Ulttar Uiymynyń UN-Habitat Uiymy, Birikken Ulttar Uiymynyń Qazaqstandaǵy ókilderi, elimizdiń barlyq óńirinen kelgen oblys ákiminiń orynbasarlary, basqarma basshylary qatysty.
Aimaq basshysy Nurlybek Nálibaev forýmǵa qatysýshylarǵa sáttilik tilep, aimaqta atqarylǵan aýqymdy jumystardy atap ótti.
«Prezidentimiz Qasym-Jomart Kemeluly «Qazaqstan ornyqty ýrbanizatsiia úrdisimen kele jatyr. Turǵyn sany millionnan asatyn qalalar elimizdiń jahandyq básekelestik qabiletiniń tiregi, al oblys ortalyqtary óz óńirleri ósiminiń ózegi bolýǵa tiis», – degen bolatyn.
Búgingi ýrbanizatsiia dáýirinde qalalardy turaqty damytýda ekologiialyq tepe-teńdikti saqtaý, turǵyndardyń ómir súrý sapasyn arttyrý – basty mindetterdiń biri. Qyzylorda – dástúrli agrarly aimaq! Qyzylorda – megapolis bolmaǵanymen, qarqyndy ýrbanizatsiia jolyna túsken, óz deńgeiinde qalalyq infraqurylym men ómir súrý sapasyn arttyrý, ekonomikany ártaraptandyrý baǵytynda naqty qadam jasaǵan qala. Qala halqynyń úlesi ósip, óńir turǵyndarynyń shamamen 50%-ǵa jýyǵy oblys ortalyǵynda turady.
Qyzylorda oblysy Prezidentimizdiń, Úkimettiń erekshe qoldaýymen turaqty damý maqsattaryna sáikes keletin, naqty strategiialarǵa, aimaǵymyzdyń zamanaýi kelbetin qalyptastyrýǵa baǵyttalǵan júieli jumys júrgizip keledi. Qazirgi tańda oblys biýdjeti 750 mlrd. teńgeden asty. Bul qarajat aimaqtaǵy eń ózekti degen máselelerdi sheshýge, turǵyndardyń ómir súrý sapasyn jaqsartýǵa, aýqymdy infraqurylymdyq jobalardy iske asyrýǵa baǵyttalýda.
Memleket basshysynyń qoldaýymen Qyzylorda qalasynda 215 mlrd. teńgege qýattylyǵy 240 MVt jańa jylý-elektr ortalyǵy salynýda. Investor «Aksa Enerdji» túrik kompaniiasy 135 mlrd. teńgeden astam investitsiia quiyp, qurylystyń 80%-y aiaqtaldy. Ortalyq qyrkúiek aiynda paidalanýǵa beriledi. Sonymen qatar, Katarmen úkimetaralyq kelisim negizinde ońtústik óńirlerde elektr energiiasynyń tapshylyǵyn boldyrmaý maqsatynda qýattylyǵy 1100 MVt, quny 892 mlrd. teńge bolatyn bý-gaz qondyrǵysy salynady. Bul megajoba 2028 jyly tolyǵymen iske qosylady.
Búgingi forým – qalalardy turǵyndarǵa qolaily, klimatqa tózimdi, inkliýzivti ortalyqtarǵa ainaldyrý jolyndaǵy birlesken bastamalarymyzdy nyǵaitatyn alań. Biz úshin forým – tek talqylaý emes, naqty áriptestikke bastaityn jol. Osy jumystardy odan ári jetildirýge serpin berip, qalalardyń bolashaǵyn qalyptastyrý jolyndaǵy ortaq maqsattarǵa jetýde mańyzdy qadamdar jasaýǵa yqpal etedi dep senemiz»,– dedi N.Nálibaev.
Forýmda QR Ekologiia jáne tabiǵi resýrstar ministri Erlan Nysanbaev, QR Syrtqy ister ministriniń birinshi orynbasary Aqan Rahmetýllin, QR Óńirlik damý ministrligi Qurylys jáne turǵyn úi-kommýnaldyq sharýashylyq isteri komitetiniń tóraǵasy Baýyrjan Júnisbekov, Qazaqstandaǵy Birikken Ulttar Uiymynyń Turaqty úilestirýshisi Sarango Radnaragcha, UN-Habitat uiymy atqarýshy direktorynyń orynbasary Rafael Týts, BUU DB Qazaqstandaǵy turaqty ókiliniń orynbasary Sýhrob Hodjimitov sóz sóiledi.
Sonymen qatar, UN-Habitat atqarýshy direktory Anaklaýdiia Rossbahtyń beinehabarlamasy kórsetildi.
