بۇگىن «ونەر ورتالىعىندا» «قازاقستان ۇلتتىق ۋربان فورۋمى 2025 – قىزىلوردا» حالىقارالىق فورۋمىنىڭ اشىلۋ ءراسىمى ءوتتى،- دەپ حابارلايدى Dalanews.kz
حالىقارالىق فورۋمعا ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ، ق ر سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين، ق ر ونەركاسىپ جانە قۇرىلىس مينيسترلىگى وكىلدەرى، ق ر پارلامەنتى سەناتى مەن ءماجىلىسىنىڭ دەپۋتاتتارى، قازاقستانداعى بىرىككەن ۇلتتار ۇيىمىنىڭ تۇراقتى ۇيلەستىرۋشىسى سارانگو رادناراگچا، بىرىككەن ۇلتتار ۇيىمىنىڭ UN-Habitat ۇيىمى، بىرىككەن ۇلتتار ۇيىمىنىڭ قازاقستانداعى وكىلدەرى، ەلىمىزدىڭ بارلىق وڭىرىنەن كەلگەن وبلىس اكىمىنىڭ ورىنباسارلارى، باسقارما باسشىلارى قاتىستى.
ايماق باسشىسى نۇرلىبەك نالىبايەۆ فورۋمعا قاتىسۋشىلارعا ساتتىلىك تىلەپ، ايماقتا اتقارىلعان اۋقىمدى جۇمىستاردى اتاپ ءوتتى.
«پرەزيدەنتىمىز قاسىم-جومارت كەمەل ۇلى «قازاقستان ورنىقتى ۋربانيزاسيا ۇردىسىمەن كەلە جاتىر. تۇرعىن سانى ميلليوننان اساتىن قالالار ەلىمىزدىڭ جاھاندىق باسەكەلەستىك قابىلەتىنىڭ تىرەگى، ال وبلىس ورتالىقتارى ءوز وڭىرلەرى ءوسىمىنىڭ وزەگى بولۋعا ءتيىس»، – دەگەن بولاتىن.
بۇگىنگى ۋربانيزاسيا داۋىرىندە قالالاردى تۇراقتى دامىتۋدا ەكولوگيالىق تەپە-تەڭدىكتى ساقتاۋ، تۇرعىنداردىڭ ءومىر ءسۇرۋ ساپاسىن ارتتىرۋ – باستى مىندەتتەردىڭ ءبىرى. قىزىلوردا – ءداستۇرلى اگرارلى ايماق! قىزىلوردا – مەگاپوليس بولماعانىمەن، قارقىندى ۋربانيزاسيا جولىنا تۇسكەن، ءوز دەڭگەيىندە قالالىق ينفراقۇرىلىم مەن ءومىر ءسۇرۋ ساپاسىن ارتتىرۋ، ەكونوميكانى ءارتاراپتاندىرۋ باعىتىندا ناقتى قادام جاساعان قالا. قالا حالقىنىڭ ۇلەسى ءوسىپ، ءوڭىر تۇرعىندارىنىڭ شامامەن 50%-عا جۋىعى وبلىس ورتالىعىندا تۇرادى.
قىزىلوردا وبلىسى پرەزيدەنتىمىزدىڭ، ۇكىمەتتىڭ ەرەكشە قولداۋىمەن تۇراقتى دامۋ ماقساتتارىنا سايكەس كەلەتىن، ناقتى ستراتەگيالارعا، ايماعىمىزدىڭ زاماناۋي كەلبەتىن قالىپتاستىرۋعا باعىتتالعان جۇيەلى جۇمىس جۇرگىزىپ كەلەدى. قازىرگى تاڭدا وبلىس بيۋدجەتى 750 ملرد. تەڭگەدەن استى. بۇل قاراجات ايماقتاعى ەڭ وزەكتى دەگەن ماسەلەلەردى شەشۋگە، تۇرعىنداردىڭ ءومىر ءسۇرۋ ساپاسىن جاقسارتۋعا، اۋقىمدى ينفراقۇرىلىمدىق جوبالاردى ىسكە اسىرۋعا باعىتتالۋدا.
مەملەكەت باسشىسىنىڭ قولداۋىمەن قىزىلوردا قالاسىندا 215 ملرد. تەڭگەگە قۋاتتىلىعى 240 مۆت جاڭا جىلۋ-ەلەكتر ورتالىعى سالىنۋدا. ينۆەستور «اكسا ەنەردجي» تۇرىك كومپانياسى 135 ملرد. تەڭگەدەن استام ينۆەستيسيا قۇيىپ، قۇرىلىستىڭ 80%-ى اياقتالدى. ورتالىق قىركۇيەك ايىندا پايدالانۋعا بەرىلەدى. سونىمەن قاتار، كاتارمەن ۇكىمەتارالىق كەلىسىم نەگىزىندە وڭتۇستىك وڭىرلەردە ەلەكتر ەنەرگياسىنىڭ تاپشىلىعىن بولدىرماۋ ماقساتىندا قۋاتتىلىعى 1100 مۆت، قۇنى 892 ملرد. تەڭگە بولاتىن بۋ-گاز قوندىرعىسى سالىنادى. بۇل مەگاجوبا 2028 جىلى تولىعىمەن ىسكە قوسىلادى.
بۇگىنگى فورۋم – قالالاردى تۇرعىندارعا قولايلى، كليماتقا ءتوزىمدى، ينكليۋزيۆتى ورتالىقتارعا اينالدىرۋ جولىنداعى بىرلەسكەن باستامالارىمىزدى نىعايتاتىن الاڭ. ءبىز ءۇشىن فورۋم – تەك تالقىلاۋ ەمەس، ناقتى ارىپتەستىككە باستايتىن جول. وسى جۇمىستاردى ودان ءارى جەتىلدىرۋگە سەرپىن بەرىپ، قالالاردىڭ بولاشاعىن قالىپتاستىرۋ جولىنداعى ورتاق ماقساتتارعا جەتۋدە ماڭىزدى قادامدار جاساۋعا ىقپال ەتەدى دەپ سەنەمىز»،– دەدى ن.نالىبايەۆ.
فورۋمدا ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ، ق ر سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين، ق ر وڭىرلىك دامۋ مينيسترلىگى قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى باۋىرجان جۇنىسبەكوۆ، قازاقستانداعى بىرىككەن ۇلتتار ۇيىمىنىڭ تۇراقتى ۇيلەستىرۋشىسى سارانگو رادناراگچا، UN-Habitat ۇيىمى اتقارۋشى ديرەكتورىنىڭ ورىنباسارى رافاەل تۋتس، بۇۇ دب قازاقستانداعى تۇراقتى وكىلىنىڭ ورىنباسارى سۋحروب حودجيميتوۆ ءسوز سويلەدى.
سونىمەن قاتار، UN-Habitat اتقارۋشى ديرەكتورى اناكلاۋديا روسسباحتىڭ بەينەحابارلاماسى كورسەتىلدى.
