Saiasattanýshy Ǵaziz Ábishev AQSh prezidenti Donald Tramptyń Qazaqstannan keletin barlyq taýarǵa 25 paiyz baj salyǵyn engizý týraly sheshimine qatysty pikir bildirdi. Donald Tramp bul jaiynda 7 shildede Memleket basshysy Qasym-Jomart Toqaevqa arnaiy hat joldap, málimdegen bolatyn,- dep habarlaidy Dalanews.kz
Eksportqa áseri qandai?
Sarapshy buǵan deiin kóktemde tarif kólemi 27 paiyz bolady degen málimet aitylǵanyn, alaida AQSh biligi 25 paiyzǵa toqtaǵanyn atap ótti.
Onyń aitýynsha, 2024 jyly Qazaqstannyń jalpy eksporty 81,6 milliard dollar bolsa, sonyń ishinde AQSh-qa jiberilgen ónim kólemi shamamen 2 milliard dollar, iaǵni bar bolǵany 2,5 paiyz ǵana bolǵan. Saýda ministrliginiń derekteri boiynsha eksporttyń 92 paiyzy ýran, kómirsýtekter, ferroqorytpalar men baǵaly metaldardan turady, al bul taýarlar qosymsha tarif salynbaityn taýarlar tizimine kiredi.
Sondyqtan jańa baj salyǵy tek shamamen 160 million dollardyń ainalasyndaǵy taýarǵa, iaǵni AQSh-qa baǵyttalǵan eksporttyń 8 paiyzyna ǵana áser etýi múmkin. Sarapshynyń boljaýynsha, amerikalyq biýdjetke bul salyqtardan túsetin jyldyq qosymsha tabys ondaǵan million dollar shamasynda bolady.
Úkimet qalai qabyldaidy?
Ǵaziz Ábishevtiń pikirinshe, bul AQSh tarapynan tek Qazaqstanǵa emes, basqa da kóptegen elge tariftik qysymnyń kúsheiip otyrǵanyn bildiredi. Biraq muny halyqaralyq investorlar naryqtaǵy qalypty qubylys retinde qabyldaidy. Onyń oiynsha, bul sheshim Qazaqstannyń investitsiialyq tartymdylyǵyna eleýli yqpal etpeidi.
"Qazaqstan Úkimeti kútý taktikasyn ustanyp, eshqandai qarsy shara qoldanbaýy múmkin. Endi basty suraq – bul tarifter amerikalyq infliatsiiaǵa, ónerkásipke jáne AQSh-tyń ózge eldermen qarym-qatynasyna qandai áseri etedi? Sony baqylaý kerek", – dep túiindedi sarapshy.
Eske sala keteiik, buǵan deiin AQSh prezidenti Donald Tramp shetelden keletin taýarlarǵa baj salyǵy engiziletinin málimdegen edi. Qazaqstan úshin alǵashynda 27% dep jariialanǵan bolatyn.
