Qonaev qalasyndaǵy jaǵajailardyń birinde jas áiel sýǵa batyp ketti. Qaiǵyly oqiǵa bolǵan sátte jaǵalaýda Májilis depýtaty Baqytjan Bazarbek te júrgen, dep habarlaidy Dalanews.kz.
Onyń aitýynsha, oqiǵa ornynda qaýipsizdikke jaýapty eshbir maman bolmaǵan: qutqarýshylar, beinebaqylaý kameralary, arnaiy quraldar men meditsinalyq qyzmetker de joq. Depýtattyń sózinshe, sý qoimasynyń jaǵasy jekemenshik kásipkerlerge berilgen. Alaida olar qaýipsizdikke emes, tek kiris kózin kózdep, shlagbaým ornatyp, kelgenderden aqy alýmen shektelip otyr.
Qyzdy sýdan kýágerler alyp shyqqan, alǵashqy kómek kórsetýge tyrysqanymen, nátijesiz bolǵan.
Oqiǵa ornyna kelgen dárigerler men politsiia qyzmetkerleri tek "bul salaǵa jaýapty – basqa ýákiletti organdar" degen jaýappen shektelgen.
Baqytjan Bazarbek jaǵajai aýmaqtarynyń kimniń ieliginde ekenin anyqtap, zań talaptaryn oryndamaǵan tulǵalardy jaýapqa tartý úshin tiisti organdardan tekseris júrgizýdi talap etetinin aitty.
Bul jaǵdaiǵa qatysty oblys ákimdigi málimdeme jasady.
Qala ákimdigi sýǵa batyp ketken qyzdyń otbasyna, jaqyndaryna qaiǵyra kóńil aitady.
7 shilde kúni bolǵan oqiǵaǵa bailanysty Qonaev qalasy Politsiia basqarmasy QR QK 306-baby, 3-tarmaǵyna (Qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetter kórsetý) sáikes qylmystyq is qozǵady. Sotqa deiingi tergep-tekserý júrgizilýde.
Qaiǵyly oqiǵa oryn alǵan demalys aimaǵynyń jumysy ýaqytsha toqtatyldy.
Aita ketetin jait, ákimdik tarapynan demalys oryndaryna, jaǵajailarǵa qatysty monitoring jalǵasýda. Monitoring barysynda anyqtalǵan kemshilikter quzyrly organdarǵa shara qabyldaý úshin joldanýda. Buǵan deiin prokýratýra, TJB, ákimdik mamandary jaǵajailarda qyzmet etetin kásipkerlermen birneshe ret júzdesip, barlyq zań talaptaryn túsindirgen bolatyn.
Qonaev qalasynda kez kelgen baǵyttaǵy ótinishti, tótenshe jaǵdailardy habarlaýǵa arnalǵan 109 Biryńǵai bailanys ortalyǵy jumys istep tur. Turǵyndar men qonaqtardan jaǵajailar men biznes oryndarynyń qyzmetine qatysty aryzdardy osy nómir arqyly habarlaýlaryn suraimyz. Budan bólek, elimizde 112 jedel jelisi de jumys isteidi.
