قونايەۆ قالاسىنداعى جاعاجايلاردىڭ بىرىندە جاس ايەل سۋعا باتىپ كەتتى. قايعىلى وقيعا بولعان ساتتە جاعالاۋدا ءماجىلىس دەپۋتاتى باقىتجان بازاربەك تە جۇرگەن، دەپ حابارلايدى Dalanews.kz.
ونىڭ ايتۋىنشا، وقيعا ورنىندا قاۋىپسىزدىككە جاۋاپتى ەشبىر مامان بولماعان: قۇتقارۋشىلار، بەينەباقىلاۋ كامەرالارى، ارنايى قۇرالدار مەن مەديسينالىق قىزمەتكەر دە جوق. دەپۋتاتتىڭ سوزىنشە، سۋ قويماسىنىڭ جاعاسى جەكەمەنشىك كاسىپكەرلەرگە بەرىلگەن. الايدا ولار قاۋىپسىزدىككە ەمەس، تەك كىرىس كوزىن كوزدەپ، شلاگباۋم ورناتىپ، كەلگەندەردەن اقى الۋمەن شەكتەلىپ وتىر.
قىزدى سۋدان كۋاگەرلەر الىپ شىققان، العاشقى كومەك كورسەتۋگە تىرىسقانىمەن، ناتيجەسىز بولعان.
وقيعا ورنىنا كەلگەن دارىگەرلەر مەن پوليسيا قىزمەتكەرلەرى تەك "بۇل سالاعا جاۋاپتى – باسقا ۋاكىلەتتى ورگاندار" دەگەن جاۋاپپەن شەكتەلگەن.
باقىتجان بازاربەك جاعاجاي اۋماقتارىنىڭ كىمنىڭ يەلىگىندە ەكەنىن انىقتاپ، زاڭ تالاپتارىن ورىنداماعان تۇلعالاردى جاۋاپقا تارتۋ ءۇشىن ءتيىستى ورگانداردان تەكسەرىس جۇرگىزۋدى تالاپ ەتەتىنىن ايتتى.
بۇل جاعدايعا قاتىستى وبلىس اكىمدىگى مالىمدەمە جاسادى.
قالا اكىمدىگى سۋعا باتىپ كەتكەن قىزدىڭ وتباسىنا، جاقىندارىنا قايعىرا كوڭىل ايتادى.
7 شىلدە كۇنى بولعان وقيعاعا بايلانىستى قونايەۆ قالاسى پوليسيا باسقارماسى ق ر قك 306-بابى، 3-تارماعىنا (قاۋiپسiزدiك تالاپتارىنا ساي كەلمەيتىن تاۋارلاردى شىعارۋ نەمەسە ساتۋ، جۇمىستاردى ورىنداۋ نە قىزمەتتەر كورسەتۋ) سايكەس قىلمىستىق ءىس قوزعادى. سوتقا دەيىنگى تەرگەپ-تەكسەرۋ جۇرگىزىلۋدە.
قايعىلى وقيعا ورىن العان دەمالىس ايماعىنىڭ جۇمىسى ۋاقىتشا توقتاتىلدى.
ايتا كەتەتىن جايت، اكىمدىك تاراپىنان دەمالىس ورىندارىنا، جاعاجايلارعا قاتىستى مونيتورينگ جالعاسۋدا. مونيتورينگ بارىسىندا انىقتالعان كەمشىلىكتەر قۇزىرلى ورگاندارعا شارا قابىلداۋ ءۇشىن جولدانۋدا. بۇعان دەيىن پروكۋراتۋرا، تجب، اكىمدىك ماماندارى جاعاجايلاردا قىزمەت ەتەتىن كاسىپكەرلەرمەن بىرنەشە رەت جۇزدەسىپ، بارلىق زاڭ تالاپتارىن تۇسىندىرگەن بولاتىن.
قونايەۆ قالاسىندا كەز كەلگەن باعىتتاعى ءوتىنىشتى، توتەنشە جاعدايلاردى حابارلاۋعا ارنالعان 109 ءبىرىڭعاي بايلانىس ورتالىعى جۇمىس ىستەپ تۇر. تۇرعىندار مەن قوناقتاردان جاعاجايلار مەن بيزنەس ورىندارىنىڭ قىزمەتىنە قاتىستى ارىزداردى وسى ءنومىر ارقىلى حابارلاۋلارىن سۇرايمىز. بۇدان بولەك، ەلىمىزدە 112 جەدەل جەلىسى دە جۇمىس ىستەيدى.
