«Qazaqstan halqyna» qoǵamdyq qoryna erikti aýdarymdar 2023 jáne 2024 jyldary aitarlyqtai azaiǵan. Bul týraly qor basqarmasy tóraǵasynyń orynbasary Sofiia Aisaǵalieva Informbiýro saýalyna bergen jaýabynda málimdedi, dep habarlaidy Dalanews.kz.
Onyń dereginshe, biyl jyldyń alǵashqy bes aiynda jeke jáne zańdy tulǵalardan 15,5 milliard teńge ǵana jinalǵan. 2024 jyly bul kórsetkish – 55,5 mlrd teńge, 2023 jyly – 64,8 mlrd, al 2022 jyly – 131,8 milliard teńge bolǵan.
Iri jeke donorlardan túsken iri kólemdegi aýdarymdardyń basym bóligi qor qurylǵan 2022 jyldyń alǵashqy ailarynda túskeni aityldy.
"Qazir ondai donorlardan turaqty qaiyrymdylyq joq. Tek tótenshe jaǵdailar kezinde ǵana jekelegen jaǵdailar kezdesedi", dep naqtylady «Qazaqstan halqyna» qory.
Mysaly, 2022 jyly «Stepnogor taý-himiia kombinaty» JShS qordyń jarǵylyq qyzmetine qarjy bólýmen qatar, qyrkúiek aiynda Qostanai oblysyndaǵy órtten zardap shekkenderge de qaiyrymdylyq kómegin aýdarǵan.
2024 jyly sý tasqynynan zardap shekkenderge kómek retinde Halyk Bank – 950 mln teńge, «Qazaqmys» – 2,4 mlrd teńge, Nursultan Nazarbaev qory – 300 mln teńge bólgen. Atalǵan uiymdar 2022 jyly da qordy qoldaǵan bolatyn.
2023 jyly «Develop4» jáne «Coffeday» JShS ai saiyn 500 myń teńgeden birneshe ai qatarynan qaiyrymdylyq jasap turǵan. Al 2025 jyly qor «Traditsiia 2019» JShS-niń úlesin atap ótti — kompaniia ár ai saiyn 100 myń teńge aýdaryp otyrǵan.
